Thursday, September 24, 2009

لجعل الحياه مكان أفضل

الموضوع بسيط أحنا محتاجين
مسدس وطلقتين
الأولنيه حضربها في دماغ تحفس أفندي
لأنه مشروع وغد مستقبله باهر
و التنيه في دماغي
علشان أنا أنسان بغيض
وبعدها هيكون العالم مكان أفضل
الموضوع محتاج
تقريبا
10 ثواني
كان معكم
البغيض
أنا

Saturday, September 19, 2009

عايز أتجوز

مطلب عام وجماهيري وعادل
عايز أتجوز
أيوه أنا عندي 23 سنه
أيوه أنا معنديش صفر أبتدي منه
أيوه لسه مالقتش بنت الحلال
أساسا أنا لسه مخلصتش تعليم
بس ده كله ميمنعش
أني عايز أتجوز
أنا

Wednesday, September 16, 2009

أنا

أنا
أنا جي أشكي
أنا لوحدي
محدش جنبي
حاسس بطول دربي
تعبت من كتر مابمشي
وعمري مابوصلشي
و أن وصلت مابلحقشي
مفيش حاجه عندي بتهدي
كله من جنبي بيعدي
ومفيش حاجه بيدي
انا
كل ده واجع قلبي
وكاتم علي أنفاسي
الدنيه مضلمه في عيني
الانفس محبوسه في صدري
و أحلامي مكبوته في قلبي
ومحدش حاسس بوجعي
علشان أنا لوحدي
أنا

Tuesday, September 15, 2009

أخبار حمضانه

بما أني بقالي مده مابكتبش
فاحتلاقوا عندي كميه من الموضيييييييييييييييييييييع القديمه
بعضها حمض وبعضها لسه في أمل منه
ومعا عناوين الأخبار
أخدت شهر ونص في الكنج
وعرفت معني "في الجيش بيقولك أتصرف"بجد
النتيجه طلعت .......وطبعا بحتفل بعيد غبائي الموسمي
وأكيد بعيد السنه
علي الصعيد النفسي أعرب مصدر مرموق (أنا) عن
وصول حالتي النفسيه إلي الحضيض
أما بالنسبه لما يختص بالمشاعر والعواطف
طبعا أحوالي زي الزفت ولسه محلك سر
وأخيرا
الأخبار الأقتصاديه
أنا بكح تراب
........
كنت ناوي أتكلم عن المواضيع دي كلها
بس مجرد كتابة العناوين جابتلي أكتأب
حبقي أتكلم عنها بعدين
كنت معكم
أنا

أنا أسف

أنا أسف فعلا أنا أسف
أنا النهارده راجع بعد تقريبا
مش عارف بقالي قد أيه مجتش
بس المهم أني راجع أعتذر لصفحتي العزيزه أني كنت غايب
عنها الفتره ألي فاتت دي كلها
كنت ناوي أنشر عنون البلوج علي الفيس بوك
و أبتدي أكتب بأسمي الحقيقي
بس النهارده بس أكتشفت أني اجبن من أني أعمل كده
يمكن خفت علي أحلامي ومشعري
يمكن خايف من أراء الناس
مش عارف
بس الحاجه الوحيده ألي عرفها أني ممكن هنا أقول كل حاجه
أعمل ألي أنا عيزه
مهما كان أنا لوحدي
ومحدش حيجي عندي
مش حخجل من الكلام ألي بكتبه علشان محدش حيقراءه
ومره أخري أسف علي أني أتأخرت عليكي
النادم علي ما فاته
أنا

Sunday, June 7, 2009

different الحياه

أفلام وروايات
أحلام وحكيات
أمال وأماني
كل ده بيجي في دماغي كل يوم وانا برفع راسي من علي المخده
النهارده ححل مشاكل حياتي كلها قبل الفطار
وأتسلا علي مشاكل الكوكب بعد الظهر في الرايق
ﻷ النهارده أنا حعمل التغير ألي طول عمري بحلم بيه
ولا أأولك أحنا النهارده نمسك حكم البلد ونعدل منها
بس للأسف بيبتدي اليوم علشان يأكدلي
أن الأمور مختلفه
الحياه مش ديما زي مأحنا عيزنها
مش كل من جد وجد
ومش كل من زرع حصد
الأمور مختلفه
مش ديما حتكون أبن الناس
مش ديما حتملك ماتتمني
مش ديما حتحقق طموحاتك
ديما الحياه حتقولك أن الأمور مختلفه
بعد أن تنتهي طموحاتك علي سلالم الفشل
وينهكك الصعود علي سلالم النجاح
بعد أستنفاذ خطواتك في طريق الألف ميل
ديما حتلاقي الحياه وقفالك
بطلعلك لسنها
وتأكدلك
أن
different الحياه
من أخر أحلامي الفاشله
كان معكم

أنا

Saturday, May 23, 2009

فن الوقوع بشياكه

لما ألقيها وربنا يسهل وأمها تدعي عليها
ياتري أقف علي ركابي وأقولها بحبك
ومقدرش علي بعدك
ولا أخد بنصايح أهل العلم
وأطبق صفحات دليل العاشق المصري
أكرف البت تلزقلق
أروح وأقولها أنا حموت من غيرك
ولا أقف وأتعنطز وأفشخ ضبي وأقولها متفرقيش معايا
أستنها لما هي تكلم
ولا أعمل أيه
أنا حاسس أني ساعت لما حلاقيها حبوس أديها وأقولها
أنتي أيه ألي أخرك أنا بقالي عشرين سنه بحبك
و أنتي لسه جيه دلوقتي
حقف علي ركبه ونص
وأتحايل عليها...بس بشياكه
وأقولها
بحبك
أنا

Monday, May 11, 2009

أخر أنفس العام الدراسي

أخر الترم التاني
و أخر العام الدراسي
الحياه بتختلف
ناس كتير بتظهر
ناس أكتر بتختفي
حلقات تبادل المعلومات
- عرفت الدكتور لغا أيه
-يعم فكك المهم أهم
- طيب عرفت أيه الموضيع المهمه
-يعم فكك الأمتحان حيكون معقد أساسا
- أيه ده هو الدكتور أتكلم عن شكل الأمتحان
-طيب أنا نازل أشتري حاجه من تحت وأشوفك لما أرجع
وحجات من دي
المهم في الموضوع أن دي الفتره ألي فيها بثبت لنفسي
أني شاب طبيعي قادر علي التعرف علي الفتيات
الكلام معاهم
الشجاعه علي الحوار مع الأخر
وبختار الوقت ده من السنه لأكتر من سبب
أولا ﻷني لو تعرضت للأحراج فحيكون يومين وأختفي وتخلص السنه
وتيجي السنه الجديده بوجوه جديده
لو نجحت فالموضوع مش حيستمر لأكتر من ساعات المحضره
وعدين أنا مش بحاول أتعرف بيكون الموضوع عباره عن حوار
سريع عن الدراسه مع بعض التعليقات المرحه
وأخيرا أعتقد أن البنات في الفتره دي من السنه بيكونوا
بيلموا المعلومات فعندهم مساحه لأحتمال الأخر
وكمان أنا بكون سعيد حبتين يمكن لأن السنه
في أخر أيامها
أوسعيد علشان أستعد لفترة الكأبه بتاعت الأمتحنات
الله أعلم
كان معكم
أنا

Saturday, May 9, 2009

أواخر أملاكي عي المريخ

طبعا مفيش فيده رجعت تاني أبص علي الكوكب الأحمر يمكن حد يكون
كتب أي حاجه
وكالعاده ملقتش حاجه وكرهت نفسي
المهم ماعلينا
دي شوية رسايل من بتوع المريخ
و أعتقد أن مفيش حاجه حتيجي تاني بعد كده
من هناك
-------------------------------------------------------------------------------------

Wednesday, August 27, 2008

واحوي ياواحوي

أولا أنا مش عارف أن كانت كلمة واحوي بتكتب كده أساسا ولا ﻷ
بس المهم أن أحنا النهارده 27 من شهر 8 وده له معنين
أولا أن يوم واحد في الشهر قرب...........وده معناه أكيد أن حالت (أكلني وأنا مالي طيب سلفني سبني في حالي) هتنتهي بس مش ده موضوعنا
النتيجه التانيه هي الي تهمنا أن رمضان فاضل عليه أقل من أسبوع
وكانت عاده أني أكتب معايده جديده كل سنه و أبعتها لكل أنسان من أحبه أو أحترمه أو رقمه عندي علي الموبايل
وبما أن السنه دي هي أول سنه تعدي علي و أنا بأكتب في حته عامه (حتي لو مكنش في حد
بيقراء الي أنا كاتبه غيري أنا )فقد قررت أني أحط المعايدات دي يمكن تنفع حد
.......................................................................................
في ليله هلالها عالي فوق السحاب
رفعت كفي بالدعاء وأنا بتمناأنه يجاب
طلببت الخير ليك
وطرح البركه فيك
وأسباغ الخير غليك
وسألت ربي يجمعني في الجنه بيك
وبرمضان يهنيك
ورمضان كريم
..................................................................................
يالي رمضان بيك يحلا
ياحلو ومفيش منك أحلا
حلوتك غطت علي حلاوة عسل النحله
طبعا هو في أحلا من لفة قمر الدين
ورمضان كريم
.....................................................................................
لما عنيك تبقي قرصيايه معسله
وودانك مشمشايه مجففه
وخدودك بندقايه مقرمشه
وشفيفك كوباية خشاف متكربسه
تتوقع أقولك أيه غير
رمضان كريم
.....................................................................................
يارب تعجب
وكل سنه و أنا طيب
----------------------------------------------------------------------------------------------------
----------------------------------------------------------------------------------------------------

Sunday, August 24, 2008

ههههههههههههههههههههه

أنا مبسوط النهارده قوي ومش عارف أيه السبب مع أني عمالي أخد علي قفايا من الصبح لحد مابقي شبه نقابة فرانين السيده زينب
النهارده عميل من بتوع الشركه الي أنا شغال فيها فسخ العقد بتاعه وأسترد فلوسه وبالتالي العموله بتعتي الي أخدت منها مقدم وصرفته
وبالتالي ديوني زادت
وصاحب الشركه عمال يستحضر لعنات زيوس وكل الألهه علي وعلي العملأ بتوعي الي محدش فيهم نافع
ونتجتي بانت ونجحت بس شايل مدتين منهم أكتر ماده بحبها وحليت فيها وهي التاريخ
وعلي الرغم من كل ده
وعلي الرغم من كل البهدله دي أنا مبسوط بس مش عارف ليه
أحساس عبيط بالأنبساط مالك علي كياني
مش عارف بس أنا حاسس أني يحتجن يأما بودع هي دي الحالات الي أعتقد أن الأنسان ممكن يحس فيها بالي أنا حاسس بيه في الزمن ده علي العموم أنا عندي طاسه في البيت لزوم الحاله الأولي ومنديل كلينكس يلفوني فيها لزوم الحاله التانيه
المهم
أنا مبسسسسسسسسسسسسسسسسووووووووط
--------------------------------------------------------------------------------------------------
----------------------------------------------------------------------------------------------------


Monday, August 18, 2008

ثورة التصحيح

من هنا ومن موقعي هذا علي المدعوق الأحمر الي قاعد عليه لوحدي أحب أوضح نقطه صوغنونه
أحنا لما جينا نسمي البلوج ده كنت أنا صاحب فكرة الأسم الي لو ترجمناه حرفيا حيكون ممعناه كلام في المريخ
وعدين أتهموني زورا بالجهل علي أساس أنه المفروض أن أحنا نكتب
talking on mars
في حين أنه كان المقصود من الأسم ده أنه يكون من عينة كلام في المشمش
بس للتجديد والتطوير ومجارت التقدم العلمي خليناها كلام في المريخ
ولأن كل حياتي في المشمش حبيت أطلع ليها حاجه جديده
فخليت كل حاجه في المريخ

--------------------------------------------------------------------
---------------------------------------------------------------------

Monday, August 11, 2008

أنتوا فين يابشر

المفروض أن البلوج ده جماعي وأن في ناس جين في الرحلات الي بعد كده علشان نستوطن في المريخ بس من الواضح أن الناس دي كانت زهقانه مني وبعتوني لوحدي علي المريخ علشان يخلصوا مني علي الأرض
بس أنا أحب أأكد للناس دي أني مش حسكت
وحفضل أرغي وأرغي وأرغي وأرغي وأرغي وأرغي علي سطح المريخ لحد مامناخ المريخ يتشبع بالرغي بتاعي ويبتدي يهطل علي الكواكب التنيه لحد ماكوكب الأرض يتلط ويتليط بالرغي بتاعي
و أنا من موقعي هذا فوق الكوكب الاحمريكا أدعو كل رغاي علي كوكب الأرض ليلحق بي علي أول طياره ورق مغادره شاطئ الأسكندريه ليستقر به المقام جنبي علي كوكب المريخ
وليحفظني الله
كاتبه
وحيد شريد فوق كوكب بعيد
----------------------------------------------------------------------------------------
----------------------------------------------------------------------------------------

Thursday, October 9, 2008

مفيش فيده

كان عبقري
الله يرحمك ياسعد يابني الراجل من قبل ميحصل أي حاجه كان عارف أن مفيش فيده
طيب
أنا حعلن أول الأنباء الديكتاتوريه
قررت أنا الغازي الموحد لكوكب المريخ بعد أجراء الاستفتاء العام بين السكان المحلين(أنا) قررت أن أعلن فرض الحظر علي الكوكب والأستيلاء عليه ومنع الزوار من دخول الكوكب وشن حرب شعواء علي كل من تسول له نفسه الأقتراب من كوكبي الأحمريك
هذا والله ولي التوفيق
حفظني الله ورعاني
أمضاء مش حستني حد تاني
--------------------------------------------------------------------------------
--------------------------------------------------------------------------------
ومع أو رساله ليه علي الكوكب كتبناها أنا ومدام عبد الوارث
-----------------------------------------------------------------------------------
------------------------------------------------------------------------------------

أول مكوك الي المريخ

أحنا أول زوار للمريخ ..
تعالوا زرونا
باي باي
-----------------------------------------------------------------------------------
--------------------------------------------------------------------
ودي أخر رساله كتبتها
-------------------------------------------------
------------------------------------------------------

Friday, December 19, 2008

كده باي باي ومن غير زعل

كده أعتقد أني مش غلطان
النهارده يبقي عدي علي البوست بتاع ألس
شهر و 6 أيام وفضلت مستني
وعدي خمس أيام جمعه والنهارده اليوم السادس
يعني لو حد كان حيكتب حاجه كان كتب
مقدرش أضغط علي حد أكتر من كده
الناس مش فاضيه للبلوج
كل واحد عنده همومه
أنا الوحيد الي بدخل أكتب هنا
وأعتقد أنه لسه بدري لحد ماحد ياخد باله ويعرف يفضي نفسه علشان يكتب بوست هنا
وعلشان كده
دي أخر زياره ليه للمريخ
باي باي
ومن غير زعل
-------------------------------------------------------
ودي كانت أخر متعلقاتي علي الكوكب الحمر

أكتشافات

في خلال المده الماضيه و من التعليقين ألي شرفوني
أكتشفت عالم واسع من البلوجات
أكتشفت أني ممكن أروح لأي بلوج و أعلق علي
مواضيعه دون الحاجه إلي دعوي
عرفت كمان أن صاحب البلوج ممكن يفلتر الردود
الوارده علي الصفحه بس لسه معرفتش أزاي
بتتعمل
وأهم أكتشاف
الناس بتعمل بلوجات متحفظه جدا
سياسيه أو فنيه
ثقافه أو أدب
دينيه
رياضيه
وحتي دراسيه
و هنا أدركت أني الوحيد تقريبا ألي بكتب
بلوج بالطريقه دي
أنا بتعامل مع البلوج علي أنه حيطه فاضيه في بيتنا
بكتب عليها كل حاجه و أي حاجه
المهم
اللذيذ
الغريب
وألي ملوش لزمه
بكتب لما بكون فرحان
ولما بكون زعلان
لما بيبقي عندي حاجه أكتبها
ولما مبيبقاش عندي حاجه أكتبها
بكتب لمجرد الكتابه
بكتب للتذكير
بكتب لنفسي علشان أقراء الكلام ده بعدين
و أسترجع أحاسيسي و أنا بكتبه لأول مره
وعدين أنا بكتب كل لما يحصلي حتي ولو حاجه تافهه
في حين أن الناس التنيه بتكتب في الشعر والأدب
بيكتبو خواطر
أدعيه
أخبار رياضيه
وبيرفعوا صور
يعني تقريبا أنا بعمل كل ألي الناس مش بتعمله في البلوجت
معرفش تسمي ده أيه
عبط
أنطلاق
تميز
روشنه
بس في جميع الأحوال
ألي بيتكتب البلوج ده بيعبر عن حاجه واحده
بيعبر عني
أنا

Thursday, May 7, 2009

هو .......... أحد صانعي أحلامي

الأحلام
أو بالأصح مملكة الأحلام
الراجل ده أحد أركان مملكة أحلامي
د.أحمد خالد توفيق
قبل مأقول أي حاجه
أكيد في ناس كتبت شعر عن الراجل ده
وفي ناس رسمته
وفي ناس قبلته وكلمته
بس أنا عمر ماشفته ولا كلمته
علاقتي الوحيده بيه هي القراءه
أخد الكتيب من دول
و أجلس في أي مكان
أقراء في هدوء وبطء
بعد بضع صفحات أكون جالس إلي جوار عبير وهي
تركب أقطاب الكمبيوتر حول رأسها
أو أسير خلف د.رفعت في صالة منزله
ولربما أشاهد د.علاء وهو يعمل في أحدي غرف سفاري
أظلم الحياه أمامي بكتابه يوتيوبيا(أعتقد الأسم كده صح)و
أشعرني بدنوا النهايه
وعلي الرغم من ذلك مازال -علي حد قوله-يزيد من رقعة
مملكة الأحلام في رأسي
منحني متعة القراءه والأحلام
كثرا بعد أن أنتهي من قراءة قصصه بمده طويله
لا أدري أن كنت قرأتها أم شاهدتها
وعلي الرغم من أنه لن يري هذا الكلام
فقط أحب أن أخبره بأني أحد محبي كتاباته
والراغبين فيها
أنتظرها بشغف
لتمنحني متعة التواجد بين أفكاره
أعيش في أحلامه
أري العالم من عيون أبطاله
فشكرا لك ألف مره
فقد منحت عالم أحلامي طابعا خاصا
طابعا يحمل أسمك

Monday, May 4, 2009

ترحيب

أسمحوا لي أن أرحب بالتعليق الثاني
الذي أحصل عليه
و أن أوجه شكري لمن سمح لي بأستعارت خواطره
و أضافتها في الصفحه الخاصه بي
مره أخري شكرا
ملحوظه
علي الرغم من أن هذا التعليق كان من غير وعد بعروسه بس
مازال يدل علي التقدم
أنا

كان ذلك بأختياري

أعلن أنا و أنا في كامل قواي العقليه
أني تخليت عن أسبوع كامل أقضيه في معسكر باجوش
الذي يبعد عن محافظة مطروح بضع كيلوا مترات
والذي قضيت مايقرب من عامين من عمري و أنا أحلم به
أعلنها صريحه مدويه لن أقضي أحد أسابيع الصيف هناك
والسبب في ذلك أني أحتاج للعمل في هذا الصيف
لتدهور الأحوال الماديه وميل الميزانيه وأختفاء العكمه الأستراتيجيه
وقد أخترت هذا وأنا في كامل وعيي
والله ولي التوفيق
أنا

Sunday, May 3, 2009

إلي الأكتأب يا رجال

أحب الأول أقتبس الخواطر دي من بلوج تاني
وأعتقد أن صاحب البلوج مش حيزعل
أو هكذا أتمني
هائمة أحلّق وحدي
أمارس طقوس حريتي
أتنشق نسمات صمتي
تنهطل أمطار شجوني
تحتفل معي
تعبث مع حروفي
تمتطي تخيلاتي
إلى أن تستوطن ذاكرتي
وتعيش معي نسيم فجري

قمت بأقتباسه من
http://yararohy.blogspot.com/
معرفش ليه فكرني بوحدتي
والأنطباع العام ألي تخلف عنه
أن مفيش فيده
الأسواء قادم
لن يكون في الأمكان أفضل مما كان
وكمان فكرني بهوايه كتابة الرسايل
أنا أبتديت أكتب رسايل موبيل للأنسانه ألي حقابلها
من بعد ما أشتريت الموبيل بشهر تقريبا
مش عارف بقالي قد أيه بالضبط بس أقدر أقول سنيين
وأنا عمالي أحشي في رسايل
بس من الواضح أنه مفيش فيده
فيسعدني أقدم لكم النهارده بعض الرسايل دي
وأسمحولي أطلب منكم الرأفه بمشاعري أو بعباره أخري
ياريت لو حد أستعمل الرسايل دي يبعتها لأنسانه بيحبها فعلا
الرأفه بمشعري

------------------------------------------------
------------------------------------------------
الرساله دي كنت ناوي أبعتهلها الليله ألي قبل فرحنا
___________________________________
فكره أول مره قبلتك فيها
لحظة ماشفتك
ساعة ماكلمتك
أول مأيدي حضنت كفك
-
ومره تنيه كنت جنبك
لما الدموع جرحت خدك
لما الحزن ملاكي وهدك
كنت معاكي بسمع همسك
-
ويوم مالدنيا ضحكتلك
و أوسع أبوبها فتحتلك
كنت هناك جنبك
ديما جنبك

في حزنك

في فرحك

كنت جنبك
علشان أقولك أني بحبك
_________________________________________
دي من أغلي الرسايل عندي وأقربها إلي روحي
يمكن علشان بتحكي حلم حياتي
ويمكن علشان كانت من أولي الرسايل ألي كتبتها
__________________________________________
ودي كانت أول معيده حبعتهلها في عيد ميلادها
---------------------------------------------------------------
عرفه النهارده بالنسبالي أيه
عرفه زي النهرده حصل أيه
النهارده شبه اليوم ألي شرفتي فيه
اليوم ألي نورتي الدنيه في
عرفتي اليوم ده يساوي عندي أيه
هو يوم عندي غالي مفيش في العمر يوم يساويه
هو يوم رزقني ربي بيكي فيه
_____________________________________________
رسايل كتير بس من الواضح أنها حتعفن عندي علي الجهاز
ومن الواضح أني حفضل أحب علي نفسي لحد مأحمض أنا كمان
كل ألي نفسي فيه
أنها تعرف أني حبيتها قبل لما أشوفها
وأني مهما حصل مستنيها
أنا

Friday, May 1, 2009

المره دي الرد طلع بجد

أخواني في اللامكن
دعونا نرحب بأول تعليق فعلي
أستقبلت أول رد
كان من
just me
يعني نوعا ما أسمه هو النسخه
الأنجليزيه مني أو العكس
أسمي هو التعريب بتاع أسمه
ما علينا
المهم أني بأوجه له شكري علي التعليق الصغير جدا
و أطلبه بالعروسه ألي وعدني بيها
وفي أحتمال كبير أرد له الزياره

Wednesday, April 22, 2009

سؤال طويل حبتين

هو المفروض أدور علي نصي التاني ولا هو ألي حيلاقيني
كل حاجه ماشيه بالأقدار
كل حاجه مكتوبه من قبل مانتكون في ظهر سيدنا أدم
فهل ياتري أدور عليها ولا هي مكتوبالي
أعيش أحلم بيها ولا أدور عليها
وعدين أنا طماع
أنا عايزها رومنسيه حنينه
فاهمه متفتحه
تحبني وتخلصلي
تصبر عليا وتقف جنبي
كل ده وأنا
معنديش حاجه أديهالها
غير أحلامي الرومنسيه
وأفكار مكنها الوحيد دماغي
وكتير من القلق علي مستقبلها
وصبر أيوب علشان أطور نفسي
مش الأفضل أني أفضل لوحدي
أحلم أنها عاشت قبلي
أو أنها حتيجي الدنيه بعدي
تعيش حياه تستحقها مع أنسان يستحقها
يقدر يسعد قلبها
ويقدر يجمع نفسه بيها تحت سقف بيت من الأسمنت
و الحديد المسلح
مش في عشه مكنها الوحيد أحلامي
ممكن حد يجاوبني
أعمل أيه
أستني ولا
أستني...
؟؟؟؟

عايز أستحمي

ببساطه عايز أستحمي
أنا أستحميت من 8سعات و25 دقيقه
بتوقيت ديب ثوت
بس لسه عايز أستحمي
عايز أقف تحت الدش وأشغل السخان
أتفرج علي بخار الميه وهو بيرسم ألاف الخيلات والصور
الرذاذ الناتج عن أرتطام حبات الميه بجسمي
السخونه في الجو
ديما بحب الوضع ده
الهدوء الممزوج بصوت اللهب الخاص بالسخان وصوت
الميه وهي بتنزل
أعتقد أنهم لو سابوني في الوضع ده حفضل واقف لأيام
أنا في المعتاد بستحمي في ساعه ألا ربع لما ببقي مستعجل
ولما باخد رحتي بفضل تحت الميه لحد ماحد يجي يخبط
علي باب الحمام علشان يطلعني
فعلا دماغي بتطفي وأنا في الوضع ده
كل حواسي بتتركز في الأحساس بدفئ الميه
وتأمل الأشكال ألي بتتكون بفرشة بخار الميه علي خلفيه من ضوء النيوون
بعد لما بستحمي بحس اني انسان جديد
أنسان مختلف
أنا جوه وعاء جديد
وبفضل بنفس الأحساس ده لحد مأبص لوشي في المرايه
وألاقي كل حاجه زي ماهي
سعتها بعرف ان مفيش فيده
أن أنا حفضل زي مأنا
و أني محتاج أستحمي تاني علشان أحصل علي أنسان جديد
غيري
أنا

...................

كل مره في المعتاد ببقي داخل و أنا ناوي أكتب
حاجه معينه في بالي
يعني لو كنت عرفت أدخل أمبارح كنت كتبت عن الأكتأب ألي عندي
وأول أمبارح كنت كتبت عن الكليه
وقبلها كنت كتبت عن النادي
أنما النهارده
عندي أحساس عجيب
شعور بالفراغ وأنعدام الوزن
أنا بتفرج علي الناس من جوه عنيه
لا دي حياتي
ولا المشاكل دي مشكلي
شويه وحسيب الراس دي و أرجع لجسمي التاني وحياتي التنيه
مفيش حاجه شغلاني
قمة اللا مبالاه
حتي مش عارف أنا داخل هنا بأكتب أيه ولا بكتبه ليه
مجرد فراغ
مجرد كتابه
مجرد أفكار ومشاعر


Sunday, April 12, 2009

كل الطرق تؤدي إلي روما

التاج المشع علي رؤس الأصحاء
أمبارح كنت متصور أني كسرت صباع رجلي في تدريبات الكنغوفو
فنزلت النهارده الصبح علشان
أروح للدكتور
وأكتشفت نعمه عمري مأخدت بالي منها
المشي القويم أنا كنت بمشي بسرعه مناسبه
بمشي برحتي بعدي الشارع بسهوله
بطلع الرصيف بكل بساطه
بنزل علي سلالم بيتنا في سواني
كل ده أختلف النهارده
لدرجة أني أحتجت أوصل للمستشفي ألي جنب بيتنا
نص ساعه في حين أني كنت بوصلها في خلال 10 دقايق
حسيت بصعوبة عبور الطريق
عدم الأتزان والخوف في كل خطوه و أنا نازل علي السلم
الأحساس بأن الشارع ماشي حاوليا برتم أسرع من المعتاد
أو أنا ألي أبطاء من الحياه كلها
ناس بتيجي جنبي وتروح وأنا لسه بخطي في طريقي بخطوات
محدوده بطيئه
وده فكرني بوضعي العام في الحياه
الناس بتيجي من بعدي تحقق أهدفها وتكمل طريقها
و أنا لسه زي مأنا
ماشي في طريقي بخطاوي هي للزحف أقرب
وألي كانوا معايا شقوا طريقهم
أنا عجوز ومسن
شيخ للفناء أقرب
كيان مهمش علي جانب الطريق
كتبها أنسان ملوش لزمه
أنا

Friday, April 10, 2009

أكبر قفا خدته في حياتي

لقيت ناس كتبه تعليقات
مششششششششششششششششششششششششششش ممكن
انا كنت متصور أني المفروض أبعت أنفيت
أو دعوه لأي حد علشان يعرف يكتب عندي
علي قد مأستغربت علي قد مافرحت
علي قد ما أتصدمت
طلع موقع أسياوي غريب
ولاعزاء للمنطظرين
المبعوت أعلاه
أنا

أنا

كل مره بتكلم عن مشعري
أحداث حياتي
الناس المحيطه بي
أحلامي
بس لحد دلوقتي معتقدش أني أتكلمت عن نفسي
وطبعا ده حيكون من وجهة نظري الشخصيه
أنا هو في زي أنا
أنا ألي وصلت ومحصلتش
أنا ألي طرت ومنزلتش
ﻷ بجد
أنا أنسان عادي من ألي بتقابل منهم دسته وأنت رايح الشغل
بتلاقيني في كل حته عند عم محمد البقال
وفي مكتب أي موظف حكومي واقف في الطبور
جنبك في طبور العيش
ماشي علي الرصيف ألي قدامك
حتي شكلي مش مميز
لا أنا طويل مسافر
ولا قصير
ممكن أكون نحيف
بس مش مسلوع
شعري مش أصفر ولا أسود ولا بني
لونه كده لو صح التعبير مدوحس
خليط من كل الألوان دي
مش وسيم
ومش بعبع
و أن كنت أعتقد أني أميل للقبح قليلا
وده طبعا بشكل نسبي
ممكن ناس تشوفني وسيم
أو ملامحي هديه
أو عفريت العلبه
أما عن طباعي
فأنا خمول مائل للنشاط
بتعصب بسرعه وبهدي بسرعه عبيط يعني
بفتكر كويس كل واحد ضايقني
بس مش بشيل يعني ممكن أسامح
بطيئ المبادره أو بتوه مش عارف
بعد مابيحصل الموقف بفكر في ألي المفروض كنت أعمله
ألا في مرات قليله ربنا بيسترها
أعتقد أني هادي
صوتي عالي وأنا بتكلم
بميل للمرح
خجول نوعا بالنسبه للجنس الأخر
وهو مايفسر أحيانا أني متعالي او متكبر
أعتقد ده ملخص طويل وممل
بالنسبه لأنسان ممكن تكون عديت من جنبه وأنت ماشي في الشارع
مع تحياتي
أنا

قمة السحر وربما أعلي

جميله
رائعه
مش عارف أساسا أذا كان في كلام يوصف جملها
حد جرب أنه ينزل بعد منتصف الليل يتمشي في شوارع الأسكندريه
بس ده طبعا في الشتاء مش في الصيف
طول فترة الصيف بحس أني مش مستريح
الدنيه زحمه
المصيفين عمالين يرموا في زباله في الشارع
الموصلات بتزحف
الوشوش الغريبه بتزيد
ده غير أخونا العرب
أنما في الشتاء
سيبك أنت
أسكندريه بتعتنا
الهدوء والسكون
الليل الساحر
صحيح لسه الزباله بتترمي في الشارع
بس في نوع من الألفه والتعود علي الزباله بتعتنا
ده كله كوم وبعد 12 مساء كوم تاني
الشوارع الريقه
مفيش غير كام واحد مروحين أو ريحين الشغل
الهدوء
النسمه العليله
مش قويه
مش سقعه نوع من الهوا متشموش غير في الوقت ده
مشابه لهوا شروق الشمس بس فيه أختلاف
وياسلام لو تشتي الشتا الخفيف
الشوارع تحت الضوء الأصفر وحبات المطر
كل ده بيطلق للأحلام العنان
الحياه ملكك
الجمال ده كله ليك لوحدك
لوحه ربانيه بها بعض الرتوش البشريه
الأسكندريه كما يجب أن تكون
أمشي في الشارع
بطل تفكرفي أي حاجه
بس تأمل في المكان من حوليك
طير معا حبات المطر
أنكسار نور العمود بتاع الشارع عليها
ملمس السيارات وحبات المطر بتنفجر عليها
رطوبه الجو
الوحده
مجربتش أمشي مع حد في الجو ده
ﻷنه في المعتاد بيفضل يتكلم أو بيجري يستخبي تحت العماير من المطر
في حين أنا بكون عايز المطر والصمت
كان معكم من أروع لحظات حياتي
مراسلكم
أنا

Tuesday, April 7, 2009

عائد من المريخ

بعد مأرسلت النصاب التذكاري بتاعي
وحطيت أنا عيله كومنت
يمكن حد ياخد باله
محدش عبرني وحسيت أني سخيف
يارب ماحولش أعمل كده تاني وأحط نفس في الموقف السخيف ده تاني
مع أني عارف أني حعملها

أخر الأخبار

سادتي وسادتي وسادتي برضوا
مع نشرة الأخبار الحياتي
ومع عنوين الأخبار
أخر تصريحات العميد عن النتيجه
الأستعدادات الميدانيه والمدنيه للزياده من اللياقه البدنيه
حقائق حول أمتحان التجاري وتصريحات منيله
ويلي ذالك الأخبار الأقتصاديه والرياضيه
صرح عميد الكليه في محاضره خبيثه مدسوسه من غير علم الطلبه
وقد أعلن أن النتيجه حتتأخر من يوم 15 من شهر 4
إلي يوم 20 من نفس الشهر أل يعني أحنا ميتين عليها
المهم ماعلينا
وننتقل إلي أخر التجديدات والتطويرات
فقد قمت أنا رحمني الله بالأشتراك في أحد الأنديه الرياضيه معلنا التمرد
علي الحاله المنيله بدنيا ألي بمر بيها والنهجان والتحير والتقطيع
وما إلي ذالك من الأحوال البدنيه الغير مستقره
وقد تم الأتفاق علي الذهاب إلي النادي من خلال وسيط وهو أحد أبناء عماتي
وقد قام المذكور أعلاه بتضليل العداله ومنحي كل مميزات الصفقه دون عيوبها
فقد أعلن أن التدريب سيكون في صورة 3 حصص أسبوعيا
وكان سبب تحركنا نحو تلك الصفقه هو المقابل المادي المتمثل في 20 جنيه
في الشهر -أتجه إلي النشره الأقتصاديه لتدرك السبب- قلت بس هي دي
وكانت الطامه الكبري عندما ذهبت إلي النادي ﻷكتشف أن المدرب أرفع من
عود القصب وعدين قلت أن الجسم مش كل حاجه أكيد الراجل ده عصبه حديد
ومع الأنتقال إلي داخل النادي العمران بالأجهزه قلت أن أنا ألي كسبان من الصفقه
ﻷكتشف أن أنا حتمرن في غرفه جانبيه
خاويه تماما وعدين لقيت الناس ألي معايه وقفو جنب بعض وعكل واحد رفع كفيه
أمام وشه زي اليابنين بس كانت الأيد اليمين مضمومه
تشي خي فو
ده ألي هما قالوه
في أيه ياجماعه أيه ألي بيحصل لقيتهم أبتدوا يجروا ورايا وعدين أكتشفت أن أحنا المفروض نجري في حلقه ورا بعض
وكل لما أجي أتكلم المدرب يقولي مفيش كلام في التمرينه
أحب أوضح للقارء أن كل التمارين كانت من غير أجهزه معتمده علي حركات منمقه للجسد
المهم بعد ماقطع خلفي تمارين
50 تمرين بطن
....
....
.
....
؟؟
((
,,,
:::
؟؟؟
!!!@#$#$
*^$%$!
وبعد أنتهاء المأساه عرفت أني أشتركت في نادي لتعليم الكونغوفو
والله ولي التوفيق
صرح أحد المصادر المسؤله عن نفسها متحدثا عن أمتحان التجاري
الصادر في يوم مش فكره معلنا أحد الأنباء التي كانت طوي الكتمان ولا نعرف عنها
أنه وفي يوم الأمتحان قام مجموعه كبيره نسبيا من الطلبه بمحاصرة دوكتور قسم الشركات
في الماده والمتحكم في نصف الدرجه
وأحاطوا به أحاطة السوار بالمعصم وكان هذا في الدورر الأرضي من مبني العميد
وتعالي هتاف الطلبه حول الدوكتور وهو يقف ينظر لهم مستندا إلي عكاز من عكاكيز البشوات
يستعمله في المعتاد في تفريق التجمهرات التي تحيط به
=الأمتحان صعب
=ده حرام والله
=ليه كده بس يادوكتور
وفي هدوء وحتي صمت الطلبه رد بصوته الجاهوري
- ياجماعه هو الواحد لما بيتجوز بيتجوز كام وحده
صدم الجميع من السؤال وحاولوا تفسيره بأي صوره وربطه من قريب أو بعيد
بصعوبة الأمتحان ولما حاروا قام أحد الطلبه بمجاراته قائلا
=وحده
-ولما يتفرعن بيتجوز كام
=أربعه
-ولما ..............................بيكون كام مره
كان السؤال صادم وخاصه للتعبير الذي قيل علي الملاء ذكورا وأناث والسؤال كان عن التزاوج
الجسدي فحمرت وجوه بعض الطلبه والطالبات وهناك من ضحك في هستيريه
ومن أصابه الذهول بصدمه حولت فمه إلي مصيده روعه للدبان
المهم أن نفس الطالب بعد مافاق من الصدمه قال
=أربعه يادوكتور
هنا قام الدوكتور برفع عصاه للأعلي لتكون في وضعية حرف اللام ل
وقال وهو بيضحك
- أنا..........الدفعه كلها
مستعملا نفس التعبير في السؤال السابق
ولا تعليق
وننتقل إلي التحليل الرياضي
قام منتخب شلتي القومي بالذهاب اليوم إلي المنتزه للعب كرت القدم
وطبعا معا الأحوال الصحيه العال لأعضاء الشله
فقد خسرنا المباره الأولي ب4 أهداف لنا مقابل 6 للفريق الخصم
و أحب أوضح أن كان معاني لاعبين من خارج الشله وكانوا متمتعين بلياقه بدنيه عاليه
وطبعا بعد تلك الطعنه النجلاء تخلي عننا اللعيبه الأجانب ولم يتبقي منهم سوي لاعب واحد
فقط قرر الكفاح إلي جانبنا
ولعبنا المباره الثانيه بالأساسي دون أحتياطي وبمجموعه من الحالات الخاصه
تربعت أنا علي قمتهم مش بقدر أجري ولا بشوف ومش بشوط كويس ومبعرفش أدافع
المهم أول المطش أتفقعنا 4 أهداف مقابل هدف وحيد لينا وجه بطريقه عجيبه شويه
وفجأه أستأسد اللعيبه بتوعنا
لتصبح النتيجه 5-5
وبعد كفاح طويل والكثير من الشوط والزعيق والتهيس والأستعباط
دخل الهدف السادس مرمانا
لتنتهي المباره 6-5
وكنت أنا الحارس المسأول عن تلك المأساه
ورجعنا نجر أذيال الخيبه
وأخيرا إلي النشره الأقتصاديه
أحب أعلن علي الملاء أن اليوم والموافق
8-4-2009
باقي معايا من فلوس ﻷخر الشهر 65
وعدين قررنا نشد الحزام
بس لقينا أنه مفيش فيده
فمن الواضح أن الفتره الجيه حتكون فترة جوع
وحنرفع شعار تقشف للأبد خطوه بخطوه علي نهج غندي
وكانت هذه أخر الأحزان
أو هكذا نتمنا
كان معكم من النشره الحياتيه
أنا

Sunday, April 5, 2009

عندما صمت ديبثوت وتكلم تودري

في البدايه أحب أقول أني أسف علي الغيبه الطويله دي
وعدين أبرر
أنا مكنش ليه ذنب في الموضوع
كل حاجه كانت بسبب عبد الوارث
أولا ديب ثوت سكت مره وحده
وده الجهاز بتاع البيت
وفي المعتاد لما ده كان بيحصل كنت تلاقي
عبد الوارث بالفنله الداخليه والمفك
وعنيه بطق شرار
ويروح داخل علي ديب المسكين
يفضل يلعب فيه لحد ماينطق
ومش كده وبس
أنا أفتكر مره أن الجهاز مات لوحده
ورجع أشتغل تاني قبل مايلعب فيه
معتقوش رح برضوا يدعبس هو سكت ليه
لحد هنا جميل
كان الوضع علي ده الحال لحد ما تودري شرف
وتودري هو الاب توب بتاع مين
أكيد بتاع عبد الوارث
وعينك ماتشوف ألا النور
ديب بقي مهمش وعنده أكتأب
ولما عطل وسكت علي حين غره
عبد الوارث معبروش ألا بعد أجيال
وكده نري أني مليش ذنب في التأخير ده

Tuesday, March 24, 2009

من خبراتي في المدرج

في الفتره الأخيره أكتشفت مجموعه من الأكتشافات الخطيره
في البدايه أحب أديكم صوره عامه
عن أصدقائي في المدرج كنت وعدتكم بحاجه زي كده
كوكو
لورد أنجليزي ضل طريقه في الأدغال
تحفة التحف بأجماع الكل
حاجه كده لايجود بها الزمان مرتين
ﻷنه لو حصل وبقي فيه منه أتنين
أعتقد أن الدنيا ممكن ميحصلهاش حاجه
مصباح
القصير المكير
برشوط الشله
طول النهار بيسلم علي علي ناس غريبه
ويتكلم مع ناس أغرب
أغلب معرفه بيكون عايز منهم حاجه
بس للأمانه مش علي طول
أحيانا بحسه جدع و شهم
مالكي
ده بقي حدوته لوحده
هو الروش بتاع الشله
بيعمل كل الحجات العجيبه ألي
الشباب بيعملوها
مأنتم ومظبط بيحور
بس بعيدا عن كل ده
تحس أنه أخوك الصغير
لذيذ وخفيف وحبوب
هندا
أسد المعارك
واحد من الشباب الكفحتي ألي بنشوفه في الحياه
شهم وجدع وراجل لأقصي الحدود
أرميه في أي حته وهو حيتعامل ويتصرف
مخضرم في معارك الحياه
وطبعا لازم أنهي بحاجه مميزه
ميشو
الشيخ التيواني
ده بقي خراج حياتي
تحفت التحف ملوش حل
مفيش وصف يوصفه
أوقات بتمني أقتله
و أوقات بحسه واحد من أخواتي
ناهيك أنه أخو مدام عبد الوارث
ده الجروب المقرب مني أوي أعتقد أني منستش حد من
ألي معايه ﻷن عددهم محدود جدا
نرجع لخبرات المدرج
في الأسبوع ألي فات أبتدينا نتعرف علي مجموعه جديده
خلاف والشيخ عبدو
والمصري
وفيه صديقنا الكشكول
في ناس بتناديه فؤاد
وناس بتقله أبراهيم
وسمعت كام واحد بينادوله حسن
فأحترنا في أسمه
نسميه كشكول
وكرمله ده أنا حاسس أنه سمنه وخنقه بس ماعلينا
لما أبتدينا ندخل مع المجموعه دي
أكتشفت حجتين
أولا
أني محبوب بينهم
علي خلاف ماكنت متصور
والأكتشاف الخطير التاني
أن بنات الشعب المصري مبيعترفوش بخجل الولد
وأعتقد أنهم بيتعملوا معاه
علي أنه عنطزه وتكبر
محدش بيتصور وجود الشاب الخجول
لازم علشان أنا منطلق اللسان مع أصحابي
لازم أكون حرك ومنتشر ومظبط
مش عارف
ودي كانت أخر خبراتي المكتسبه
من مدرجنا الواسع
كان معكم محدثكم
انا

هي دي الحياه

مش عارف أقولكم أيه
أنا بقالي 3 أيام عمالي أعدي في حاله متقلبه من المشاعر المختلفه
أحيانا
أنا أسعد من أعبط واحد أتوجد في البشريه
سعيد لدرجه محدش يقدر يوصفها
سعيد لدرجة أني لما بلقيش حاجه بعملها بفضل أضحك زي المعتيه
لوحدي ومن غير سبب
وسعات بحس اني من ملح الأرض
مجرد حبايه من الرمل
علي شاطئ الأسكندريه
حاجه ملهاش أي قيمه ولا لزمه
في زي الملاين
ملاين مين قول بلاين
وجودي زي قلته
أي حد ممكن يشغل مكاني
أحيانا تجيلي حاله رضي تامه عن نفسي
أنا ألي وصلت ومحصلتش
أنا ألي طرت ومنزلتش
أنا أنا ومفيش زي أنا
والكلام ده
مش ممكن أكون أحسن مماكنت
ومفيش أفضل من ألي أنا عليه
مش عارف أنا معتوه ولا جلدة المشاعر
عندي بتنقط
وغرقت حمام مشعري وطلعت علي الصاله
مش عارف
المهم
والحاجه الوحيده
ألي ححاول أحافظ عليها
أني أفضل أنا
أنا أبن الأرشيدوق
أنا أخو عبد الوارث وتحفس أفندي
أنا زي مأنا
و أكيد كان معكم أنا

Wednesday, March 18, 2009

ذلك الكأن للذيذ

سنتكلم اليوم عن ذلك الكأن اللذيذ المسمي
البطاطس المحمره
تعيش البطاطس المحمره وتتكاثر في المطابخ
وتختلف أشكالها ومسمياتها
ولكنها تبقي في النهايه
مندرجه من سلسلت المحمرات
وتتكاثر اليطاطس المحمره عن طريق التزاوج الاجنسي
ولكن بطريقه مختلفه
فالأنقسام لا يكون بطريقه زوجيه
ومطابقه
وأنما يكون في عدة طرق
وينتج عنه أصابع البطاطس المحمره والتي لاتتفق
في الشكل الخارجي كما أن هذا الأنقسام
يكون محدود ومحصور في وحدة البططسايه
التي تحدد علي أساس حجمها
بالأضافه لأسلوب ست البيت في التقطيع
عدد الأصابع التي ستنتج عن البططسايه الواحده
وتكون دورة حيات البطاطس المحمره قصيره جدا
فهي تبداء مع بداية تقشير ثمرة البطاطس
مرورا بمرحلة الأنقسام
أنتهاء بمرحلة التحول النوعي
من بطاطس نيه إلي بطاطس محمره
وهي تعد أطول مراحل حيات البطاطس المحمره
و أسخفها
الواحد يفضل ملطوع جنب الطاسه
لحد بسلمتها لما تستوي وساعة الأكل
تخلص في ثواني
المهم نرجع لموضوعنا الأساسي
ونتيجه لهذا التحول الكبير في المرحله السابقه
فأن البطاطس المحمره تخرج إلي الحياه
الجديده وهي شديدة السخونه
وتنتهي حياتها أيضا بعد تلك اللحظه
ولكن بأوقات متفاوته
تقدر علي أساس طفاسة ألي حياكل
وجوعه
والحد الأقصي للمده دي مش بيوصل
للنص ساعه
لتنتهي حياة هذا
الكأن اللطيف
المقرمش من الخارج والطري من الداخل
في مصارين سعادتكم
كان معكم مراسلكم من مطبخ بيتنا
أنا ألي أبتديت أجوع

أظن وأعتقد

أكتشفت النهارده أن عندي
عاده غريبه وأعتقد انها عاده مش محببه
ﻷن تأثيرها علي الناس مش حلو
أنا لما بيكون في حد بيتكلم معايه أو بيخطب في مجموعه أنا من ضمنها
بركز في عنين ألي بيتكلم
وتأثير الموضوع ده متفاوت
النهارده واحد من بتوع التيار الأسلامي
كان بيتكلم قدامي
وكانت كل لما عينو تيجي في عيني
كان بيتردد وبيتلخبط
ولاحظت أني لما بتكلم مع حد بيكون جنبي
مببصلوش
بلف راسي نحيته بس مش ببصله
مش عارف العادات دي صح ولا ﻷ
بس هي معايه من لحظة الميلاد علي مأعتقد
ححاول أخد بالي من نتايج لموضوع ده بعد كده

Friday, March 6, 2009

وكان يوما

النهارده خرجت مع أسرتي من نحيه
السيد الوالد
كان اليوم لذيذ
وأتبسط
معلش معنديش ما أضيفه
تصبحوا علي خير

Sunday, March 1, 2009

أنا تاني

طبعا أكيد أنتو لسه فكرني
مش معقوله تكونوا نسيتوني
ده مفيش غيري أساسا علي السفينه
المهم ماعلينا
أنا
قررت النهارده أعمل حاجه حندم عليها بقيت عمر ي
أو علي الأقل لمدة يومين قدام
أنا قررت أبعت موجه تنيه
إلي كوكب المريخ
يمكن حد يرد
مع أني عارف أن محدش حيرد بس عندي أمل
المهم أنا حتكل علي الله
و أبعت النصاب التذكاري بتاع
يوم السبت المعجزه
يمكن
كان معكم
أنا
ألي لسه عنده أمل

الحدوته الجزء التاني

أعتقد أن أنتوا وصلتوا لحد لما
قررت أضم صحبتنا الي بتتصل لقائمة أخواتي
بس الأحداث أتورطت لمرحله مكنتش أحب أنها توصلها
مبدأيا
هي كانت بتبعتلي رساله كل سعتين تلاته
و كنت برد عليها
فضلنا علي الشكل ده يومين تقريبا
لحد هنا والوضع كويس
بعديها لقيتها في يوم كنت بحضر فيه وكنت علي أخري
ومنفوخ وعامل الموبيل سيلنت
عملالي بتاع 17 مسد
وبعتالي رساله تقولي أنت مبتردش ليه
جيت علي بليل وأنا عارف أنها بتكون قفله الموبيل
وبعتلها رساله أقولها في حاجه
جالي الرد تاني يوم الصبح علي النحو التالي
----------------------------------------
ﻷ مفيش حاجه
أنا قلقت لما أنت مرديتش
وأحنا صحاب فحبيت أطمن عليك
علشان مبتردش
-----------------------------------------
كنت عايز أرد عليها
بأن أنا أقصد هي بتتصل ليه من الأساس
بس سكت
المهم جت كده علي الساعه 12 الظهر
وراحت متصله تاني
قولت مبدهاش
رديت
وطبعا هي مكنش عندها كلام تقوله وأنا
ضربت لخمه ﻷني كنت متصور أنها بتتصل علشان تقولي حاجه
ولما سألتها أيه سر الأتصال ألي محدش بيتكلم فيه قالتلي
أنها بتتعرف علي أكتر
المهم قفلت وقلقت
لأنه بقيت بتتصل تكلمني كل يوم أكتر من مره
وعدين بيني وبينك
أنا مش ملاك
لقيت شوشو قعد علي ودني وهاتك ياوسوسه
البت وقعه
دي هي الي جتلك
فرصتك
البت صوتها حلو
وهاتك يهري في ودني
المهم خلال يومين كانت دماغي أبتدت تلعب وتودي وتجيب
وتخطط وتكتك
أقبلها فين
علي الكورنيش
لقيته علي ودني بيقولي الكورنيش زحمه
خدها حته فضيه
المنتزه
أنطونيادس
خليك مبتكر
صراحه قعدت أفكر في الموضوع
لحد ما ربنا سترها معايه
أفتكرت
أفعل يأبن أدم ماشأت
كما تدين تدان
طيب وبعدين
الحل الوحيد ألي لقيته أني أنفخ البنيه لحد ماتزهق مني
وبكده أكون طفشتها وسترت نفسي
وفعلا
أستنيت لحد ما بعتتلي رساله من ألي ممكن نقول عليها رساله جهزه
بس في حبي وقلبي
وكلمتين تنين
ورحت خابط عليها
بعتلها أقولها أحنا أتفقنا نبقي صحاب
والكلام ده مينفعش
وميصحش
وتمام علي كده
بعت تقولي ﻷ أحنا صحاب بس الرساله جتلي
وعجبتني قلت أبعتهالك
المهم
بقيت كل ماتتصل بيه
ألم معاها في الكلام
رسايل عاديه محيده
لحد ماصحيت في يوم من غير مأستلم منها
أي حاجه
قلت خير
أستنيت يوم والتاني والتالت
قلت خلاص البت أتنفخت
وفرفرت مني وتمام أوي لحد كده
شلت نمرتها من علي الموبيل
علشان شوشو يهبط ويبطل يحرك ويلعب
لحد أمبارح
كنت ماشي في الشارع مع التحف التلاته
أصحابي
ميكي
مصبح
كوكو
وحتكلم عنهم بعد كده بالتفصيل
المهم رقم غريب بيتصل
+ألو
-ألو
الصوت ده أنا سمعته في قبل كده
+مين معايا
-أيوه أنا أسفه الموبيل ضاع مني
وأنا بتصل أطمن عليك
وأول ماحجيب موبيل تاني حديك رقمه
+هه
-ألو
+أيوه يا......أنا معاكي خلاص ماشي
المهم أنتي كويس..فداكي
+سلام
-سلام
ومش عارف المفروض أعمل أيه
شويت كلام ناشف ومتكلمنيش هنا تاني وخلاص علي كده
ولا أعمل أيه بالضبط
المشكله أني عبيط
لسببين
أولا
خايف أزعلها تكون دي هي الحب المنطظر
هي سذجه حبتين
ولسه عيله بس مش عارف
كل ماجي أشد تيجي الفكره دي في بالي
وتاني حاجه أني مبحبش أزعل حد مني
يعني لو رجعت للجزء الأول من القصه
حتلاقيني بعد مازعقت لصحبتها الأتنين
بعتلهم رسالة أعتذار
فمش عارف أعمل أيه
أنا حاليا سايبها للظروف
وربنا يعين
سلام

في مثل هذا اليوم

لتتذكر البشريه هذا التاريخ جيدا
أنه في يوم السبت
الموافق
28-2-2008
قمت أنا بحضور
يوم دراسي كامل
في كلية الحقوق جامعة الأسكندريه
من الساعه الثانيه والنصف ظهرا
وحتي الساعه التاسعه والنصف مساءا
وهي السابقه الأوله من نوعها
منذ تاريخ ألتحاقي بالجامعه
أي منذ سبع سنوات
والله ولي التوفيق
محدثكم أنا

Wednesday, February 18, 2009

أخر بيان لهذا اليوم

ححاول الفتره الجيه أخلي الأرسال بتاعي
منتظم في شكل أسبوعي
ألا في الحالات ألي بيحصل فيها حاجه تستاهل
الكتابه
كان معكوم في هاذا اليوم الطويل
ألي أطول من ديل التنين
مراسلكم من الفضاء
أنا

قصه أكتملت ولازم أحكيها

النهارده برضو كان بيحتوي علي مأعتقد أنه فاصل الختام
في حدوته طويله جدا
أعتقد أنها أبتدت في بدايات شهر 5 من سنة 2008
أبتدي الموضوع برساله لذيذه من رقم غريب
فرديت برسالة شكر مع توضيح أن الرساله وصلتني
غلط
بعدها بشويه نفس الرقم أتصل بيا
مبقتش عارف أرد عليه ولا ﻷ
ولما طول قلت مبدهاش
=ألو
+ألو أيوه ياعمو أسماء موجوده
صوت بنوته صغيره أنا كنت متصور أن عندها 12 أو 13 سنه
=ﻷ ياحببتي النمره غلط
+طيب شكرا ياعمو
لحد هنا عادي
المهم البنت دي أتصلت بيه تاني من أكتر من رقم مختلف
وكل مره تسأل علي أسماء
وكل مره بتعامل معاها علي أنها بنت صغيره
و أكلمها براحه يمكن تكون 5 أو 7 سنين
لحد مجتلي الرساله دي في يوم17-5-2008
وكانت من الرقم ألي كلمني أول مره
-------------------------------------
أسماء أنتي فين
أنا بتصل بيكي وكل مره يرد
عليا واحد غريب
أرجوكي أتصلي بيا في
موضوع مهم
----------------------------------
طبعا أنا مقدرتش أمسك نفسي من كتر الضحك
كنت حموت
وعدين قلت لنفسي دي أكيد عندها 5 سنين
ملهاش حل تاني
أستحملها لحد مارصيدها يخلص وأهي أزمه وتعدي
المهم فضلت تتصل وأنا بكل أحترام
أرد عليها وأقولها أن معنديش بنات وﻷ أخوات
ولا قريب أسمهم أسماء
لحد ما في مره صحتني الصبح من النوم
وهي حاجه منصحش حد مش مجهز بتجهيزاته العسكريه
الكامله أنه يعملها
=ألو
+ممكن أكلم أسماء ومتقوليش مش موجوده
قلها بس أن أنا صحبتها وعيزاها في موضوع
مهم
=يابنتي-علشان أحسسها أني كبير في السن-أنا لو
أعرف أسماء دي كنت خليتك تكلميها وأشتريت
دماغي
+أنا علي فكره متأكده أن ده الرقم بتاع أسماء ولو
سمحت عايزه أكلمها
أحب أوضح هنا نقطه صغيره بس علشان المشاهد
ميتوهش مني
أحدي عماتي العزيزات حولت قبل كده تعمل معايه لعبت
المعاكسات بالموبيل
فخفت أبجح تيجي أوفسيد ولا حاجه في حد من قريبنا
ونعود للبث المباشر
=أبقي أتأكدي من أرقام أصحابك في الحضانه
قبل ماتكلميهم في التليفون
+علي فكره أنا مش عيله أنا عندي 19 سنه
صدمت مفهوشا من غبائي المتناهي
بس بمقوحه صامده
=برضه لسه عيله
+ليه هو حضرتك عندك كام سنه
=عندي من العمر مافيه الكفايه لأدرك أن أنتي بتلعبي
ولو سمحتي كفايه أزعاج علي كده
+طيب معلش أنا أسفه
=سلام
+سلام
أسد وحش حمش
كل ده جه في دماغي
المهم لحد هنا كويس
علشان تجيلي رساله بعدها بكام شهر وتحديدا
يوم 20-10-2008
من رقم تاني خالص وجديد
وﻷني غبي كنت نسيت الموضوع الأولاني
مع أني محتفظ برسيله عندي علي الموبيل
فعملت نفس التصرف الأولاني
وبعت رسالت شكر ومعاها توضيح أن الرساله وصلتني غلط
وجالي الرد بليل في شكل تمسيه لذيذه
قلت مبدهاش ده حد يعرفني ولسه جايب مبويل جديد
أو كما يفعل شعبنا العظيم غير رقمه
وهو موضوع أحب أخد معه وقفه
الشعب المصري بعمل أميل جديد و
بيغير رقم الموبيل بتاعه مرتيين في اليوم
وهي عاده مقولكش تشل
المهم
أستمر الموضوع علي النوال ده مده طويله
شويتين
بالضبط لحد يوم 20-12-2008
لقيت الرقم بيتصل قلت أكيد سلم
وعايز يعرفني بنفسه
=ألو
+ألو
صوت بنت صغيره أعتقد أنها12 أو 13 سنه
أنا شفت الفيلم ده فين قبل كده
+ممكن أكلم أسماء ياعمو
حسيت بوجع في راسي وصداع
حسيت أني ممكن أتجلط
=يابنتي أنا مش قلتلك أن مفيش حد في الرقم ده
أسمه أسماء
مفيش بنات هنا أساسا
+بس ياعمو أنا عيزاها ضروري
اللهم طولك ياروح------ده أنا
=أبقي روحي زوريها في بيتها
+مهو أحنا بنتصل علشان مش عرفين بيتها
=والمفروض أنا ألي حعرف فين بيتها
لو سمحتي متتصليش بالرقم ده تاني
+طيب أنا أسفه سلام
=سلام
ومفيش خمس دقايق وأستلمت الرساله دي
------------------------------------------
وحياة أمي منا
سيباكي مخليه أبوكي
يرد عليا وميعرفش
بنته ماشي
__________-----------------------
صراحه من الغباء جتلي كومه وسكت وقلت
أنا لو كلمتها حقل أدبي
خليني ساكت أحسن
المهم جتلي رساله تنيه
في يوم 22-12-2008
فقلت مبدهاش شحنت
وأتصلت بيها وكلمتها كلمتين نشفين
صراحه صعبت علي وأنا بزعقلها وعدين كمان أدتني
وحده صحبتها علشان تسكتني بس برضو
خدتلهل كلمتين حلوي
وقفلت السكه
بعدها بيومين بعت رساله أعتذر عن أسلوبي في الكلام
وطلبت منهم ميتصلوش بيا تاني
وأتصلو بعدها بشويه
أعتذروا وقالولي أنهم كانوا غلطانين في الرقم
و أنهم مش حيزعجوني تاني
وخلص الموضوع علي كده
ههههع ﻷ
جتلي رساله من رقم غريب يوم15-2-2009
ولأني حمار وبرضوا لأن المسافه بعيده عملت نفس العمله المنيله
بس المرادي لحقوني في الأول
صحبة الرقم بعتت تطلب تتعرف عليا
ﻷنها شيفه أني محترم
وقالتلي أنها أتأكدت من ده من صحبتها ألي كانت بتتصل بي
وتسأل علي أسماء
وأنه التعارف حيكون بالرسايل
يعني من غير مقابلات
بيني وبينكم أنا قلت حشتري دماغي
ومش حخسر حاجه وأهو الواحد يحس أنه منحرف وأتعرف
علي حد من غير نية الأخوه
علي الرغم من أنها من ساعتها و أنا
حاسس أنها أخت صغيره جديده حتضاف ألي قايمة
أخواتي البنات الطوووووووووووووويله أوي
وكده أعتقد أن القصه أنتهت
ولو جد جديد حاجي وأكمل الحدوته
سلام
علي فكره أخر رساله وصلتني كانت النهارده يوم18-2- 2009
يعني القصه دي أستمرت مايقرب من التسع شهور

عائد من هناك

أعتقد أني بقالي مده طويله مجتش
والأرسال كان متقطع
والحاله كانت ضنك علي الأخر
تقدرو تقولو أن المركبه بتعتي توكتوك313
دخلت فجوه في الفضاء ولقيت نفسي تايه في اللامكان
من فتره أكتشفت أني كبرت
أكتشفت أني فضلي شهرين وكام يوم
وحيبقي عندي 23 سنه
وأنا لسه عند الصفر
ﻷ صفر أيه ده رفهيه ممتلكهاش
أنا حتي معنديش صفر أبتدي منه
ده غير أني لسه مخلصتش تعليم
يعني تقدر تقول الفشل بعينه
أبسط حاجه ممكن توصلك حلتي لما تحفس أفندي يقولي
أنت فاشل
ومكنتش بهزار
المهم مش حغوط في الموضوع لأني لسه فايق منه طاظه
النهارده ومن سعتين أو تلاته
خدت فردتي التنيه
ألي لسه متكلمتش عنها خالص وهو
كوكو وأبسط تعريف ممكن يوصلك فكره وافيه عنه
أنه لورد أنجليزي ضل طريقه في الأدغال
أو طفل لقي نفسه في معمل وكالة ناسا لوحده
يعني حاجه زي كده
المهم أخدته و أنطلقنا إلي عزه اللذه
وجبنا كوزييين أيس كريم
وأتمشينا علي الأبحر
وأعدنا نتكلم
في كل حاجه
بس مش هو ده الي فوقني
وخرجني من الشعور المنيل ألي كان عندي
أنا خلال المشوار ده قدرت أرسم أبتسامه
علي وجه أنسانه
أعتقد في رأي الخاص أنها متعودتش تبتسم
حسيت بعدها أن الدنيا ضحكت في وشي بعد ماكانت مكشره
ويمكن الأحساس ده مزرنيش من زمان
كان معكم العائد من هناك
أنا الوحيد ألي بعتقد أني سعيد

Friday, February 6, 2009

يارب أرزقني منهم مارضيت

أنا بأدعي ربي يرزقني زوجه وأطفال
ويارب يكونوا أطفال كتير
من سواني كنت بسمع مجموعه من الأطفال بيقروا
قرأن بالترتيل والتجويد
مش عارف
حسيت بسعاده ملهاش حدود
وبدعي ربنا تكون ذريتي من الأطفال الصالحين
وأكون من الصالحين
وهي برضوا تكون من الصالحين
وربنا يعين
يارب
يارب
يارب
يكونوا كتير
يارب يكونوا صالحين
يارب تكون صالحه
يارب أكون أنا كمان من الصالحين وأربيهم كويس
يارب
أهدينا يارب العالمين

أنا هنا

أيه الأخبار
الناس ألي لسه مجوش عملين أيه
أخبار الدنيا معاكم أيه
أنا
أنا الحمد لله مبسوط والحياه حلوه- رغم أنف الحانقين
ألي أحياننا بكون منهم-علي الرغم
من أن في تجربه النهارده بدعي
ربنا يعديني منها علي خير
النهارده المفروض كما أعتقد في وحده من أخواتي البنات
بتحاول تغير من وضعها بالنسبالي
أو أنا حاسس بكده
وعلي أساس أحساسي ألي علي طول بيكون مش صح ألا فيما ندر
أبتديت مناورات أنقاذ ما يمكن أنقاذه
بعد جلست الأستشاره مع عبد الوارث و مدام عبد الوارث
قررت أقوم بهجمه من تحت لتحت
بغرض أيصال مشاعري الأخويه للطرف الأخر
وردعه عن الي في دماغه وربنا يستر
وأعرف أحافظ عليها كأخت
لأني حفتقدها
وحزعل فعلا لو خسرتها
ياريت تتدعولي واليوم يعدي علي خير
ﻷن في أحتمال مامتها تكون قعده معانا أو حد من أخوتها
بس
لو الأمور وصلت لطريق مسدود
وبقت يأما يمين يأما شمال
ففي الحاله دي أخسرها أفضل من أني أعلقها
بأمال مش موجوده
وربنا يعين
سلام علشان عايز أكتب بوست تاني
أشوفكم تاني
في البوست الجاي

Thursday, January 29, 2009

سؤال محيرني من مده

هو سؤال غريب ومش عارفه حل
وأعتقد أن السؤال ده ملوش حل معين
يعني حتبقي أجبته نسبيه بتختلف من شخص للتاني
مين ألي حبه أهم في الجواز
يعني تكون الست بتحب الراجل أهم
ولا الراجل هو ألي بيحب الست
أنا سامع واحد عبقري حيجي بعد كام سنه ويقول وهو بيقراء البلوج
أكيد الحب المتبادل هو أفضل حل
أحب أوجه تحياتي لهذا العبقري
و أقوله
أن لو في حب متبادل مكنش في لزمه للسؤال من أساسه
أنا بتكلم في علقات اليومين دول
فلان بيحب فلانه بس هي متعلقه بتلان
وتلان مش شاغل دماغه غير ترتانه ألي بتبص وبترسم علي أبن الجران
ألي بدوره بيحب فلانه الأولنيه ألي بطبيعت الحال مطنشاه
علي أمل أن فلان ياخد باله
في الحاله دي
لما أتنين من الناس دي يتجوزو
مين المفروض يتجوز مين
في ناس بتقول أن الراجل مبيعرفش يحب
وأنه بيتعود أنما مبيحبش
وفي ناس برضوا بتقول أن الراجل ألي بيحب
مبينساش أبدا علي غرار الحب الأول
وعلي النقيض الست مش علطول بتكتفي براجل واحد
هي عيزه ملامح ده مع عقل ده ونحط عليهم أخلاق ده
يعني قص ولزق
وبرضوا بيكون عندها صورة فارس الأحلام ألي مبتتنساش بسهوله
فمين ألي بيكون حبه أهم في العلاقه دي
لما أقول أن الست حبها أهم
معني كده أن الراجل ممكن يلعب بديله
ولو قلت أن حب الراجل أهم
فمعني كده أن الست مش حتكون رضيه عنه
يعني متجوزاه من منطلق ظل راجل ولا ظل حيطه
سبب التساؤل ده أني بفكر
يوم ماجي أتجوز أخد وحده بتحبني وهي بالنسبالي
أنسانه كويسه وبس
ولا أدور لحد مالاقي ألي تخطف قلبي
وعدين أحاول أسكن حبي في قلبها
ولا أريح نفسي وأعمل زي ماأنا عامل دلوقتي
وأسيبها علي الله
أنا بفكر أنه مش ضروري أدور
لأن كده أو كده
هي مكتوبالي من قبل مالدنيا تتخلق
حقبلها وحيكون أن قلبي ينادي عليها
وأن هي حتملي
وتحبني
ونتجوز
وأتمني أن أحنا نعيش في تبات ونبات
ونخلف صبيان و بنات
وبالمنسبه أنا نفسي في أربع توائم
عمرو و يوسف و مني والأخرانيه
ياأما حياه أو نور
لسه مقررتش
أنا عارف أني طماع
بس أعتقد أن هي حتفهمني
وحتحبهم أكتر مني
يارب أرزقني بيهم هما وأمهم
وأجعلني وأياهم من الصالحين
مع تحيات
وحيد ومبسوط جدا
ولسه مستني

الحمد لله

أنا مبسوووووووووووط
مبدأيا أنا عارف أني مبجيش هنا غير وأنا مبسوط
أو وأنا متنكد
بس حعمل أيه ده حال الدنيا
أمتحاني التالت عدي وأعتقد أني حليت حلو
والأهم من كده أني أعتقد أني نجحت في التقليل من هوايه مكنتش راضي عنها
وأعتقد أني بعون الله حخلعها من جدورها
وده في حد ذاته كويس
حسيب المكان دلوقتي
علشان أنا حروح أكتب بوست تاني هنا
باي باي

Friday, January 23, 2009

أنا تعبان أوي

أنا تعبت ومش عارف من أيه
حاسس أني مخنوق والدنيا كتمه علي نفسي
أنا مش طايق نفسي وقرفان من نفسي
مش عارف أذاكر ومش عارف أركز في أي حاجه
ومش عارف أخرتها أيه عندي أمتحان بكره
ومخلصتش نص المده حتي ومش عارف حعمل
أيه
أنا تعبااااااااااااان
وعايز أعيط ومش عارف
خلاص أنا أستويييييييييييت
أكيد في حكمه من تحريم الأنتحار
مع أني مش عارف هي أيه بس
لأنه حرام
ويمكن لأني جبان أنا لسه منتحرتش لحد دلوقتي
تعبت من كتر التفكير
كنت بعيش في فترة سلام نفسي بعد فرح الواد عبد الوارث
بس من أمبارح وأنا حاسس أن الدنيا أديق من خرم الأبره
ومش عارف ليه
من قبل مأنام أمبارح وأنا عامل زي الكنيف الي مزرتهوش ميه بقاله سنه
خلاااااااااااااااص
كفااااااااااايه
حرااااااااااااااااااااااااام
أنا مش قادر أكمل
حاسس بوجع في صدري
ومخنوق
ومش عارف أيه أخرتها
أنا حقوم أستحمي
و أحاول أقعد أذاكر تاني يمكن تظبط معايه المرادي
أسف علي الأزعاج
بس أنا مليش غير ربنا أفضفضله
ومن بعده الصفحه الغلبانه دي
طولت عليكي معلش بس أنا
عارف أن أنتي حتستحمليني
يارب رحمتك
أمضاء
تعبت من كوني لوحدي

Sunday, January 18, 2009

و ألتقيت به

يوم فرح الواد عبد الوارث
قابلت واحد من الناس الي كان ليهم دور كبير في حياتي
فعلا الأنسان ده علي الرغم من العلاقه البسيطه الي بتجمعنا دلوقتي
غير في حياتي كتييييييرررررررررررررررررر
علمني معنا الأحلام والخيال
أول من علمني أن الحلم ممكن يكون أي حاجه
في أبسط الأشياء
وأغربها
أنا لسه فاكر لما كان واخدني أنا وعبد الوارث وودانا قلعة قايت باي-أعتقد أسمها
كده صح-ويومها سألته المسمير الكبيره بتاعت السفن القديمه
كانوا بيعملوا بيها أيه
ضحك وراح قايلي أن الملك كان بيقعد علي سور القلعه من فوق
ويدلدل رجليه في البحر ويسلك سنانه بالمسمير دي
والناس بتكون بتغسله رجليه في مية البحر
مع أني فهمت أنه كان بيهزر بس لحد دلوقتي
مبقدرش أعدي قدام القلعه ألا ويجي في بالي
صورة لأنسان عملاق قاعد علي سور القلعه ومشمر رجليه
والناس كتير صغيرين ملمومين حولين رجله بيغسلوها
وهو ماسك مسمار عملاق بيسلك بيه سنانه
ومن يومها مبطلتش أتخيل أغرب الحجات
وكان هو أحد المشاركين في هذا الموضوع
كان واحد من صانعي أحلامي

Thursday, January 15, 2009

أنا مبسووووووووووووووووووووووووط جدا

اليوم زاد عدد أسرتنا الكريمه
أنضم للأسره فرد جديد هو مدام عبد الوارث
النهارده كان كتب كتاب عبد الوارث
كان اليوم روعه
الكل كان مبسوط وضحكنا لحد ما بوقي وجعني من كتر الضحك
عبد الوارث كان مبسوووط أوي ومدام عبد الوارث كانت مبسوطه برضو
صورت صور بالكيلو ده غير الفيديوا
بس الأهم من ده كله بالنسبالي
مجموعه رائعه من الذكرايات الي معتقدش أني ممكن أنساها
ولو بعد العمر بعمر
وهذا يجعلني أعلنها صريحه مدويه
أنا أعلن وأنا بكامل قوايا العقليه
أعلنها علي الملاء
أنا سعيييييييييييييييييييييييييييييد جدا ونفسي أتفتحت علي الجواز

Sunday, January 11, 2009

مناورات حلف شمال الأطلنطي

من سيكوسيكو 1 إلي القاعده أحنا مترقبييين
من القاعده إلي سيكوسيكو1 أحنا معاهم مش معاك هاهاهاها
السنريو ده هو الي حسيت بيه في دماغي لما عرفت أني مستهدف
ومن مين من أعز الناس وأقربهم الي
أرشيدوق النمسه المخلوع
أكتشفت أن في محاولات من جانبه علشان يجوزوني
بس علي مين أنا عملت في لحظة المواجه عبدوا الأهبل
أساسا
أنا مشفتهاش غير ربع ساعه ولو شوفتها تاني معتقدش أني حتعرف عليها
بس الملابسات أكدت أن في مؤامره بتحاك في الخفاء علشان شد رجلي
بس المعلومات مأكدتش تواطء أرشيدوقي الحبوب
وعلي الصعيد الأخر
صرح أحدهم لعبد الوارث أني مستهدف
بس أنا رافع شعار
لا تعارف ولا صداقه حتي تتحقق الشروط التاليه
أني أتخرج
أشتغل
يكون الدخل مناسب
ألاقي شقه
وبعد كده حبتدي أدور علي العروسه
ألا إذا كان ربنا محضرلي حاجه عنده في علم الغيب
وحتي ذالك الحين
أنا خارج نطاق الخدمه
وربنا يستر علشان أعتقد أن حيبقي في محاولات أقتناص يوم كتب كتاب عبد الوارث
بسأنا عامل خطه متخرش الميه وربنا يستر ويعدي اليوم علي خير

كتب الكتاب

عبد الوارث حيكتب كتابه يوم 15
وااااااااااااااااااااااااااااااااااااااااااااااااااو(الجمهور) بجدألف مبروك
ده خبر الأخبار
طبعا عبد الوارث نزل يجيب بدله مع أخو العروسه وأنا طبعا كنت متواجد في الأحداث
وأنا أخيرا أقنعت أرشيدوق النمسه المخلوع-بابا-بأني مش لازم ألبس بدله
وهو أجبرني أني ألبس قميص وبنطلون
يعني أتفقنا
والأستعدادات بتجري علي قدم وساق
والمعاد قرب والعاقبه عندكم في الأفراح
مراسلكم
أنا الي حاكل كل الجتوه هاهاهاهاهاهاهاهاهاهاهاهاهاااااااااااااااااااااااااااااااااااااااااااااع

يموت الزمار

مفيش فيده ديما عندي أمال في كل حاجه
عيز أجرب شعور اليأس
ببقي في قمة الأحباط بس عندي أمل أنا الأمور حتبقي أفضل
النهارده مقدرتش أقاوم رغبتي في زيارة المريخ
ورحت وأنا عندي أمل أن حد يكون كتب حاجه ولا دخل وأكتشف أني مشيت بس للأسف
أتضح أني أتفه من أن حد ياخد باله أني مشيت
محدش دخل ولا كتب أي حاجه
أعتقد أنها مش حتبقي أول ولا أخر زياره
ديما حيفضل عندي الأحساس المنيل بأني حروح في مره ولاقي حد كاتب حاجه
ماعلينا
كان معكم
الوحيد والمتوحد والي قاعد لوحده
أنا

Thursday, January 8, 2009

أنا تعبااااااااااااااااااااااااااااااااااااااااان

في البدايه أحب أوجه لنفسي أطيب التماني بالسنتين الهجريه والميلاديه الجداد
وأقول لنفسي في المنسبه العظيمه دي ...هبي نيو راس
وأسف علي أني أتأخرت في الكتابه
بس أنا تعبان حبتين ومخنوق شويتين
وكده يعني أكيد كل الي مش سمعني عرفين الأحساس ده بيقولوا أن الأنسان له دورتين
وحده جسديه ووحده نفسيه
الأول بتبقي في أفضل حلاتك الجسمانيه حتي لو كنت مش مركز
والتنيه بتحس بالأنبساط وبمشاعر إجايبيه كتير حتي لو كان جسمك مفشفش
وطبعا بتكون في أفضل حالاتك لما الأتنين بيبقو في مرحلة صعوود
وفي أنيل حالاتك لما تعدي في مرحلة هبوط في الأتنين
ماعلينا
أهو كلام والناس بتقوله وأحنا ملناش دعوه بالنميمه
المهمأنا تعبان فعلا عندي خمول غريب غير أني داخل علي أمتحنات مصحوبه بسحابة الكأبه المعتاده
بس المره دي زياده صلصه
لأني أول مره حدخل أمتحن من غير مأكون بشتغل قبل الأمتحنات
مش عارف خايف أفشل وأنا قاعد في البيت
الأول لما كان بيحصل حاجه كنت بقول لنفسي أنا برضو كنت شغال
بس المره دي أنا فاضي
عندي رعب من الفشل ويضاف الي سحابة الكأبه الي زياده صلصه
شعور منيل بستين نيله من الأحباط
عندي رغبه في أني ألاقي وحده وأدلعها ولأني من النوع الفاشل
أجتماعيا ومش مصاحب ولا ليه مزه وجرل فرند
مفيش نتيات أساسا
الأنوثه معدومه في حياتي
القحط والجفاف الأبدي
هو عزائي الوحيد أنه قحط أختياري
بيجيلي أحساس ورغبه في أني ألاقيها
مش عارف هي مين بس عندي أحساس أني أول لما حشوفها حتسكن قلبي من قبل معرفها
أو حتي أتكلم معاها
أنا عارف أنه تصور طفولي حبتيين
بس هو ده أحساسي
وبعدين حتجوزها مش عارف برضه أزاي في الظرووف العجيبه الي أحنا عيشنها
بس برضه مش مهم
وعدين حبتدي أفجر كل الأفكار الي نفسي أعملها عليه
هو صحيح مفيش حد هيقراء الموضوع ده حتي ولو بعد زليون سنه بس محبش أتكلم
عن حاجه زي كده
رغباتي دي كلها مكبوته وقربت تفرقع وتجبلي تررلي في نفوخي
فعلا محتاج لوحده أقولها بحبك
أبسط حاجه توصلك أحساسي
أنا لي بعض المحاولات في كتابة رسايل الموبيل
كتبت رسايل تعارف وغزل وعتاب وزعل ورسايل علشان أصالحها ورسايل علشان لما تتقل عليا
كتبت كل أنواع الرسايل الي تنفع لكل المناسبات
ومحوشها علي الجهاز
ومستني
بس فعلا تعبت من كتر الركنه
أنا خلاص تعبت وحفرقع ومش عارف أخرتها أيه
أنا أسف (بعتذر لنفسي الي صدعتها بكل الحجات الي هي عرفاه بس فعلا كان لازم أنفس عن نفسي)وححاول مطولش كده مره تنيه
ومره تنيه أحب أقول لنفسي هبيييييييييييييي نيووووووووووووو راااااااااااااااس