Friday, December 19, 2008

من الموجه الأخيره

النهارده أرسلت أخر موجه الي كوكب المريخ
النهارده أعلنت أني سبت الكوكب
معرفش أذا كان حد حياخد باله منها قريب ولا ﻷ
بس معتقدش أن في حد حياخد باله منها أساسا
مش عارف أنا الي فاضي ولا الناس دي مشغوله فعلا
بس كان نفسي يعملوا البلوج ده
كان حيكون حاجه لذيذه
بس مفيش نصيب خالينا هنا زي المجنيين
وعدين أنا صراحه مبسوط بالكلام مع نفسي يعني مفيش حد هيفهمني أكتر من نفسي
وحتي لو مش مبسوط
مفيش حد يشاركني في هذا النشاط البسيط
أنا أعتقد أني كتبت مايقرب من 30 بوست خلال 3 أشهر
بس كنت لوحدي الي بكتب كلهم بيدخلوا يقرو ويطلعوا
فبجملة لوحد أقراء ولوحدي بكتب
ولوحدي بعيش
وحفضل لوحدي

Monday, December 15, 2008

عن المرض اللعين نتحدث

أنا مش حتكلم عن سرس أو الملاريا أو حتي الأنفلونزا
أنا حتكلم عن المرض الي أعتقد أن مفيش حد في الدنيا معييش بيه بأحدي صوره
أنا حتكلم عن الحب
الأحساس القاتل بالأحتياج للأخر
النص التاني
النص الحلو
أي تعبير من دول حيكفي
الطفل بيحب أهله
الصديق بيحب صديقه
الأخ بيحب أخوه
وطبعا الصوره الأعظم والحاله الأكثر أستعصاء عندما يحب الحبيب حبيبته أو العكس
أنا عندي 22 سنه
طوال فترات عمري ممرتش بتجربة الحب
ده بيديني أحساس يالعجز
أو الأنعره
بحس أني عاجز لما بشوفهم بيلاقوا أهدافهم أو مايتصورو أن هو نصهم التاني
ويسعوا أليه
وبحس أني أنعور لأني مرضتش بأي وحده من البنات الي قابلتهم في حياتي
علي الرغم أنهم بيشكلوا مجموعه مختلفه ترضي كل الأذواق والتطلعات
وعلي الرغم من كده
أنا مشفتش في أي وحده منهم النص التاني بتاعي
بس للأسف كل لما بفكر أن لاقيت وحده مناسبه لي أبتدي أفكر
أيه الخطوه الي جيه
أتعرف عليها
أحبها
تحبني
وبعدين
حقدم لها أيه مقابل حبها فين الأستقرار
أنا لسه مخلصتش دراسه
وبأذن الله بعد لما أخلص بعد عمرا طويل أنشاء الله
حتكون عندي مهمة البحث عن الصفر الي حبتدي منه
فلا أراديا ببتدي أدور علي عيوبها علشان أنساها أو أصرف نظر عنها
ده غير الي مش بيحركوا فيا غير مشاعر الأخوه البحته
بس في الفتره الأخيره
أبتدت نتايج المسار ده تبان
عندي أحساس غريب بالوحده
عندي أحتياج للشعور بالحب
ﻷ أسمع دي عندي أحتياج عارم أني أدلع حد
وأنا مش بتكلم هنا عن الدلع الجسدي
أنا بتكلم عن الدلع الروحي
محتاج حد أوصله مشاعر الدفئ والحنان الي أعتقد أنها عندي في مكان ما
أكيد حيكون عندي مشاعر زي دي
الناس كلها بتتولد بالمشاعر دي وعدين أنا مستهلكتش المخزون الي عندي
أو بالأصح مستعملتوش أساسا
وأعتقد أنه أبتدي يطفح وعما قريب حيظروط الدنيا
خلاص أنا فعلا أنا تعبان
أنا فعلا محتاج حد أشاركه حياتي
أخوكم
الوحيد و المتوحد والي قاعد لوحده
أنا

Thursday, December 11, 2008

من حقائب المريخ

النهارده كنت ماشي جنب مدرستي الثانوي القديمه طوسون الثانويه بنين(مصنع الرجال(أرض الضياع (أوسع مدارس الحياه(حيث يتحد الشئ مع الاشئ))))وكان نفسي من زمان أعدي عليها (من خمس سنين وأنا بفكر في الموضوع ده) أول مأبتديت أقرب منها كانت ذكرياتي عنها بترخ علي دماغي وكنت ماشي بضحك بصوت عالي بسأول ماقربت من الباب حسيت بخوف من أني أدخل المدرسه
ياتري لسه المدرسين بتوعي فكرني؟
ياتري هما لسه موجدين أساسا ؟
وقفت قدام الباب وبطلت أضحك ورجعت تاني لطريقي الأساسي
خفت علي الذكريات الجميله الي عندي تروح لما أدخل ولاقي كل حاجه أتغيرت
خليها ذكريات سعيده بدل ماتكون واقع غريب عني
........................................

مين الوغد الي قال أن الحياه حلوه

أموت وأعرف مين السفيه الي كان متصور أن الحياه حلوه
تصور معايا يوم من حياتي
أصحي الصبح -مابين العاشره والثانيه ظهرا-وأفطر وروق والذي منه و....الخ
أنزل خمس أدوار علي رجلي علشان عمرتي الغاليه مفيهاش أسنسير
وبرضو أقول الحمد لله بعيد عن دوشة الشارع
أروح الكليه علشان أدخل أحضر المحضرات الي علي وبكون قاعد علي بنش فزيائي
بيحول مقعدتي من الشكل الهندسي النصف دائري الي زاوية مثلث قائم الزاويه
وبرضو أحمد ربنا أني لقيت مكان أجلس فيه بدل مأجلس علي السلم
وساعتها مقعدة الواحد بتكتسب أشكال تكعيبيه نهيك عن الرطوبه والبهدله بتاعيتها
ويعدي اليوم الجامعي علي خير أطلع أتمشي من عند المجمع النظري مرورا بمحمد أحمد
في محطة الرمل علشان نتغدي أنا والتحف صحابي
وصولا الي المنشيه علشان يبتدي صراع الأجيال علشان أعرف أركب وأروح بيتنا
وبعد النصر المتوج بريحة العرق أكون ركبت
أوصل البيت علشان أطلع نفس الخمس أدوار بتوع كل يوم
سلمه أحمد ربنا علي أن أحنا بعيد عن دوشة الشارع
وسلمه أدعي علي صاحب البيت ﻷنه مرضيش يخلي السكان يركبوا أسنسير بعد مالموا الفلوس
أوصل البيت
أكل لقمه و أقعد شويه وعدين أنزل نفس الخمسه الحلوين
أتمشي معي صحابي
مفيش مانع من ساعة بنج بونج
تمشيه من ميامي علي البحر لحد عزه في المندره وكوزين أسكريم و للخلف در
وعدين العوده الي بيتنا السعيد
طبعا متنساش الخمسه الطيبه الي حنطلعهم لحد البيت
لحد هنا الموضوع جميل والحياه حلوه
أصحي تاني يوم وعندي أمل أن العماره تكون نقصت دورين من تحت ولا حاجه
علشان أفتح الباب ﻷكتشف أن في قط مكافح طلع لحد الدور الخامس علشان
يلبي نداء الطبيعه -الثقيل- علي المشايه الي قدام باب بيتنا
وعدين قال أيه الحياه حلوه
أسفوخس
................................................................

يوم.. مش عارف بس أعتقد أنه مش زي أي يوم

لما الواحد بيكون راكب في مركب ويفضل باصص في أتجاه حركت المركب بيحس أنه مبيتحركش
أنه ثابت لحد مايبص لور علشان يعرف هو بعد قد أيه عن المكان الي كان فيه
نفس أحساسك في لحظات السعاده أو في الأحلام مبتبقاش عارف أنت بتتحرك أزاي أنت في سوانب بتكون واقف قدام الحاجه أو الشخص الي أنت بتبص له ومبتعرفش مين قرب من التاني أنت الي مشيت ولا هوا الي جالك
................................................................

أكيد ولازم

أخصمك أه أسيبك لا...وجوا الروح حتفضل حبيبي الي أنا بهواه

مافي أعيش ألا معك ......... مافي أكون ألا إلك

قلبي ورحي معك...

بيكفيني تقللي بحبك هيـــدي الكلمة بتقتلني

مشتاقة ليك شوق الهوي لروحي
و حياة عينيك دابت انا روحي
من زمان مشتاقة انا اشوفك


أول مره أدرك أيه الي بيعجبني في نانسي
مش جمالها الصناعي ولا كونها صاروخ أرض جو
السبب هو كلام أغانيها
أكيد أي وحده ممكن تفرم قلب أي واحد بكلام ودلال نانسي
أكيد كل واحد فينا نفسه يلاقي وحده تقول له ولو ربع كلامها بس يكون من قلبها
عن نفسي أنا بتمنا أقابل وحده ربنا يجمعني بيها وتحسسني بالرعشه الكهربيه اللذيذه
الي بحسها لما بفكر في كلام أغانيها
..................................................................

Monday, September 22, 2008

great men and they white shoes

من 8أيام فاتو رحت أشتريت كوتشي!!!!!!!!!!!!!!!!!!!!ا
بس مش أي كوتشي
لأني لأول مره أشتري حاجه أنا راضي عنها 100 في 100 وكمان أمي ماختلفتش معايا في السعر كالعاده
لونه أبيض ورباطه أبيض كله أبيض في أبيض نفس الحلم القديم الكوتشي الابيض الي جي في العلبه البيضه يخطفني و ...أحم أحم ماعلينا مش موضوعنا
المهم أني أول مره لبسته ونزلت بيه الشارع كانت مع ولدتي
ساعيتها حسيت أحساس أقل حاجه توصفه أنه بديع
أحساس رجعني 17 سنه لورا
نفس أحساسي وأنا نازل أول يوم المدرسه رايح أولي أبتدائي
كنت لابس كوتشي أسود بسوسته من الجنب شبه الكوتشي بتاع عبد الوارث وكانت أول مره يسيبوني أجيب
حاجه شبه الي هو بيجيبها
كنت حاسس يومها أني بمشي بسرعه وأن نطتي عاليه وأني ممكن أجري أسرع من الأول
بأختصار علشان ذكر القدرات الي منحها لي حيحتاج وقت حسيت أني بقيت سوبرمان
كان أحساس روعه كأني ماشي فوق السحاب
مش عارف ليه الأحساس ده جالي يوم مالبست الكوتشي الأبيض
ساعيتها وشي أحمر من السعاده الطفوليه الي أنا حسيتها وضحكت ولبيت نداء مشاعري
ومشيت بسرعه لحد مأمي نادهت علي علشان هي مش قدره تحصلني
علي فكره أنا فضلت أسبوع أمشي بالكوتشي الأسود بتاعي جوه الشقه بالليل بعد ماكل أهلي يناموا
وبرضو مقدرتش أقاوم نشوة أني أعمل نفس العمله دي أستنيت لما أستفردت بيه بليل
ولبسته وفضلت طول نص ساعه أجري بيه وأنط في الشقه لحد محسيت أني رجعت عندي 5سنين
زي أول مره
كان فعلا شعور مايتوصفش

توزيع الحقوق

مع أني عارف أن مفيش حد حيدخ البلوج ده خلال التسعتاشر ألف سنه الي جيين
بس لازم أدي كل واحد حقه
ده مش أول بلوج لي
كان في المفروض تجمع كامل علي كوكب المريخ علشان نتلم عليه
وعملنا البلوج
وطلعت وأستنيت علي الكوكب
لما الشمس هرت قفايا
وزهقت من أني أفضل مستني لوحدي
علشان كده سبت الكوكب
صحيح أنا كده لوحدي برضه بس الوضع مختلف لأني مش مستني حد
أنا هنا لوحدي
ومش متوقع أن حد يجيلي علي المركبه
يعني ممكن أمشي سلبوته ومفيش رقابه
المهم الناس دي ليهم علي حق الذكر
----------------------------------------------------->أنا شلته والي يعوزه ممكن يطلبه مني
ده اللينك بتاع البلوج القديم
يمكن الناس الي تيجي بعد بليون سنه تحب تشوفه
ومن الأسم بتاعه حتعرفوا أنا جبت أسم البلوج بتاعي منيين
وعلي فكره أنا صاحب أسم البلوج القديم
كده أنا أبقي عملت الي عليا

من كو كب المريخ

أنا ونفسي
بحبها وبعشقها ..وعشقها كاويني في الدم بتجري جو شراييني
بين ضلوعي سكنه وعيشه علي أحلامي
من عيني شيفه وبوداني سمعه
من كلامي بتنطق ولساني بتسبق
ملكت علي رووحي
مش عارف أعمل أيه أنزعها أزاي
أطلعها أزاي
أخلعها أزاي
من روحي أتملكت وعليها أتسيدت
أمال لعينه ماسكة فيا وتبت
مش راضيه تسبني وتفلت
ماسكه في رقبتي وفي حضني متكلفته
حالفه ماتفارقني ألا بطلوع رووحي
من الخيال بتنسجلي حياه
في الأيام بتديني أمل
من جوايا بتنادي بتقولي لسه في بكره
لسا الأيام جيه .. لسه عمرك مبتداش
من يوم ماتولدت محسبناش
أنت لسه جي لسه أيامك ماتشافتش
وأحلامك لسه متحققتش
مش راضيه تسبني في حالي
مش عايزه ترحمني باليأس
لس في بكره أقوله مهو زي أمبارح
تقولي عندك النهارده غيره
مش قادر
الدنيا خنقاني وكبسه علي أحلامي
تقولي من الخنقه في فكه
وأحلامك ليها سكه
متنساش أن الدنيه متخلقتش فجأه
متفتكرش أن في حاجه سهله
بس مش قادر فعلا تعبان ومش قادر
مفياش حيل أغامر
مفياش حيل أعافر
سبيني ليأسي
بكأبته يغلفني
ويسلب عمري مني
وتخلص الحياه وهي وخده حقها مني
تقولي أنا معاك مش سيباك
أنت حبي مش مفرقاك
من أحلامي روياك
واليأس مش حيخدك حته من الأملاك
أقولها قلبي تعب
تقولي ولو فيها الهلاك
أنا معاك ووراك
ومن أحلامك حنسجلك بكره
ومن ذكرياتك حبنيلك دنيه
والعالم حملكهولك في سنيه
ومن قالبي مخرجتش
ومن بين ضلوعي ماخرجتش
بتغذبني ببكره مش جي
وبتوعدني بحلم مش حي
وأنا وراها ماشي
زي الأعما جراني
ماشيا قدامي وسحباني
ومعرفش علي فين وخداني
وأديني ماشي

Thursday, December 4, 2008

الصوره

اليوم هو يوم مشهود له تاريخيا
النهارده يوم حتتناقله الأجيال
ويتكلموا عنه أكتر من الأساطير
النهارده بس أتصورت صوره شخصيه
أيه!!! ﻷ
أنا مكنتش عايش مع أهل الكهف
أنا كنت علي طول بتصور بس كانت صوري مرعبه حبتيين
وعلشان تستوعب الفكره دي شوية حوارات دارت قدام الصور بتعتي
+وريني كده الصوره
-أتفضل
+ياساتر يارب أنت كنت عيان وأنت بتتصور ....مكنت أستنيت لما تخف
-أحم...أحم أصلي كنت محتجلها ضرووري
................................
+ودي صور ه وهو صغير
=ياماما أنا خايف مين ده
-صورت مين دي ورييني كده
+خد شوف
-اممممممممم ده أنا تقريبا
=يماما ألحقيني أنا مش عايز أقعود جنبه ليعضني
.....................
وهكذا لتدرك حجم المأساه الي كنت عايشها
لحد النهارده
أنا رحت أستلمت الصور الجديده
بس أيه موذ علي الأخر
الشعر متزبط
العنييين مفتحين عليشان أنا علطول بقفلهم
حتي محاولة الأبتسام بينه
صحيح هي عوجه بقي بس مش مشكله
المهم أنا مبسوووووووووط جدا بالصوره دي
أحتمال تلاقوها بكره في الجرايد المحليه
وممكن أنشرها علي البلوج معرفش أمتي بس ححاول

هو أيه الي بيحصل في الدنيا

النهارده كنت راجع مع عبد الوارث من شقته الجديده الي كان بيعاينها
ومتسرحش بعيد أحنا هنا بنتكلم عن شقه إجار جديد
المهم عدت قدمنا وحده كتكوته صغنونه دقيقة الملامح تفكرك ببربي
وقع منها جراب نضاره أو موبيلمأخدتش بالي صراحه
قام عبد الوارث نده عليها وأنا وطيت أخدت الجراب من علي الأرض
وأديتهلها
طلع صوت ملأكي خافت
-مرسي
أول حاجه جت في بالي أنها بنت ناس
وعدين أكتشفت أني حكمت عليها علي أساس شكلها وأنها قالتلي مرسي
يعني لو كانت قالت شكرا مثلا مش حتبقي بنت ناس
حسيت بالجهل والتضاؤل
أنا زي كل الناس بحكم بالمظاهر
وعلشان اللغات تبقي بنت ناس
والعربي بقي دون المستوي
ربنا يهديني

Tuesday, December 2, 2008

عن النجوم سنتحدث

لما أقول أني حتكلم عن النجوم أستطيع أقول بكل تواضع
أني حتكلم عن نفسي (للتواضع معاني كتير) وعن الناس الي حولي
في البدايه حعرفكم بنفسي
أنا ... هو في زي أنا
أنا الي مشيت وموصلتش وطرت ومنزلتش
أنا أنا ومفيش زي أنا
المهم أنا الوسطاني بين أخين من الذكور
عبد الوارث أكبر مني بتلت سنيين
وتحفس أفندي وده أصغر مني بسبع سنيين
ومن الواضح أني مش البكري ولا أخر العنقود
وهو وضع حرج للي مجربش
فأنا القائم بالمهام التي يرفضها البكري ولا يتحملها أخر العنقود
يعني كل حاجه تقريبا
حبتدي بالأول ..................................> عبد الوارث
وزي ماهو واضح من أسمه أنه المتحصل علي كل حاجه
هو الذكي الطيب المريش والبكري علي مستويين
علي المستوي بتعنا وعلي مستوي الأسره الحاكمه-أسرة السيد الوالد أرشيدوق النمسا الأول-يعني - وبكل حقد - هو خد حنان لما أتكرع
سرحان شويه وسهون حبتين بس قلبه زي البفته البيضه
بيقوم بأدوار كتيره في حياتي
أخويا الكبير وصديق ومستشار والبنك الأوطني لقروض السلف تلف والرد خساره
والممول الأول لسلسلة مشاريع ليك وحتاخد ومع الزمن حتنسي وكمان بعتبره كاتم أسراري
ويجي بعد كده..............................................> تحفس أفندي
وده بقي حكيته حكايه أولا أصغر من في البيت
يعني سكر معقود وأخر النقود إلي أخر العك ده
وطبعا هو لاسكر ولا نيله
المهم بيقوم الأستاذ تحفس بمجموعه من الأدوار المهمه
فهو مفتي الديار الفسكونيه والعامل علي أثارة القلاقل في دولة عظمة أرشيدوق النمسا الأول
دول النجوم الي معايا الي أقدر أتكلم عنهم برحتي من غير مأقلق ومن غير مايقدروا يقولولي
بم معلش السيطره مطلوبه برضوا
صحيح عبد الوارث هو البكري لاكن بمزاجي
أعد يتحايل عليا وأحنا في الرحم
والنبي أنزل الأول
حجبلك حسيبلك نصيبي في عصارة اللحمه
لما تشرف حتلاقي الأمور متمهده
وأتاري السوسه رامي ودنه بره الرحم وعارف أنه حيبقي بكري تربيع
المهم أنا قلبي طيب وحنين سبته ينزل
وأديني بدفع التمن حتي يومنا هذا
الحمد لله علي كل شئ
كفايه عليكم كده المرادي
أحسن أنا حاسس أن أنتم صدعتوا خلاص
كان معكم محدثكم
أنا