Tuesday, July 17, 2012

فله .. شمعه منوره


من الأمور اللطيفه ألي علي طول بتحصلي
لما بكون متضايق أوي .. وفي قمة أكتأبي
لما حد بيقولي عامل أيه  .. بقوله فله شمعه منوره
وبكون أقصد أني  فله مش قادر أفكر في أي حاجه
وشمعه منوره .. يعني بتحرق زي أي شمعه منوره
اللطيف هنا أن الناس بتفترض أن دي علامه كويسه .. وبيكون ردهم في أغلب الحالات 
طيب الحمد لله يارب دايما
بسكت
وبحمد ربنا 

من أيام حياتي


حكتب تاني .. أنا نفسي مش مصدق ده بس أديني بجرب وأشوف الدنيا هتمشي أزاي
يومي النهارده كان حاجه كده محصلتش 
صحيت من النوم متأخر 
كلمتها
علشان أعرف أختها عملت أيه في الثانويه العامه
في العاده قلبي كان بيكون بيتنطط لما بسمع صوتها
بس النهارده .. صوتها كان بيوجع قلبي
واضح أن خلاص .. وأن الكسر ألي كسرتهولي هيكون جزء مني
لسه هكلمها بكره تاني علشان أقولها كل سنه وأنتي طيبه
المهم 
حاولت أني أخرج من الأحساس ده 
حاولت أشيل الحواجز ألي بيني وبين الناس المتطوعين في مشروع أنسان 
لأن كلهم بيتعاملوا معايا هناك  كأني وباء من الأفضل الأبتعاد عنه
علشان يجيلي تليفون من لمبه
أربعه من أصحابنا عملوا حادثه
2 في غيبوبه والأتنين أخوات
واحد منهم رجليه وواحده من أديه مكسرين وهيحتاج يركب شرايح وعنده شرخ في الجمجمه
والتاني عنده  كسر في القفص  الصدري .. ونزيف داخلي
والتالت فايق بس مش بيشوف ورجله أتكسرت  .. وهيركب مسامير
والأخير فايق بس عنده شويه رضوض وجروح
أعتذرت وممشيت من السنتر بتاع أنسان
وأخدتها كعب داير بين المستشفايات
ولسه راجع البيت من شويه عندي مجموعه من الأحاسيس اللطيفه
ومعناوياتي ملهاش حل
والمفروض أني كنت هروح المنطقه الحره بكره 
علشان أشوف شغل
ومش عارف لحد دلوقتي حقدر أعمل ده ولا لأ
ربنا يعين
كان معكم السعيد دائما
أنا
:(

Monday, July 16, 2012

أنا ..


ماكنتش أعتقد أني ممكن أرجع هنا تاني
مكنتش ناوي أرجع أساسا
فات كتير علي أخر مره كنت فيها هنا
حجات كتير أتغيرت .. كان نفسي أقول أن أنا ما أتغيرتش وأني أقوي من أن الظروف تغيرني
بس للأسف
الظروف طحنتني
بس برضوا نصفتني
الحمد لله أنا أتخرجت حققت حلمي وعديت سنه من أول مره 
وبكده أكون أتخرجت بعد 8 سنين أول حاجه جت في بالي لما مشسكت الملف بتاعي
أن والدي الله يرحمه أتوفي وهو نفسه يشوف الورق ده
الحمد لله
الحمد لله أخدت أعفاء من الجيش
كان أغرب أعفاء .. دكتور الباطن حولني نظر وأخدت أعفاء نظر مع أني المفروض نظري ما يطلعنيش
الحمد لله كان أعفاء بعد فضل ربنا بدعاء أمي
الحمد لله 
أشتغلت في محل ملابس .. وفي محل لعب أطفال .. وأشتغلت في فودافون في التسويق الخارجي
والحمد لله سبت كل الشغل ده
مش عارف ليه بس من الواضح أني مش بتاع شغل
الحمد لله
أمي أشترت لي شقه 
الحمد لله
علي الصعيد النفسي والعاطفي الحمد لله الذي لا يحمد علي مكروه سواه
مش عارف أعمل أيه
بس برضوا الحمد لله
المفروض اني حروح المنطقه الحره وبرج العرب أدور علي شغل
مع أني كاره الخطوه دي جدا .. بس ما باليد حيله
الحمد لله
مش عارف إن كنت حرجع هنا  تاني 
مش عارف إن كنت حكتب تاني
مش عارف .. دي بقت أكتر كلمه بقولها
الحمد لله علي ألي أنا مش عارفه وعلي ألي أنا عارفه
الحمد لله علي كل حال
كان معكم
أنا