Thursday, June 2, 2011

أنا مش عارف أنا عايز أيه .. ولا بعمل أيه
حاسس أني تايه
مش عارف أذاكر خالص .. ومش عارف أركز في أي حاجه
حتي النوم مش بعرف أنام كويس
مش عارف أنا ليه عايش
قعدت أفكر النهارده في مستقبلي .. أحيه لقيته مشرق بطريقه مش ممكنه
طبعا علشان أنا بقالي مده مش بكتب فاممكن نحط النقط علي الحروف علشان ألي مش موجود يعرف يتابع معانا طبعا بما أني أنسان عبقري فأنا في أخر سنه في الكليه صحيح هي تامن سنه بس مش مشكله
ومن يومين تقريبا كملت 25 سنه
حفترض أني بأذن الله طلعت من المود ألي زي الفل ده وأبتدييت أذاكر
والحمد لله أتخرجت
وعدين لبست جيش سواء سنه أوثلاثه
حطلع شاب عندي من 27 ل 29 سنه مستعد يبتدي حياته ويكون نفسه من تحت الصفر بحبتيين
واللهم لا أعتراض
بس المشكله ألي بواجهها دلوقتي أني ببساطه خايف أتخرج
حفشل فين تاني غير في الكليه
بعد 8 سنوات مباركه من الفشل المستمر حفشل فين تاني
مش حشتغل محامي علشان قال أيه أخلاقي
ومانفعش في الأعمال اليدويه ﻷني لو حد عطس جنبي مقولكش ممكن تجيبني من أخر الشارع
أما عن المؤهلات فحدث ولا حرج
مافيش لغات
مافيش كمبيوتر
مافيش غير شهادة الحقوق وألي حأجيبها بأقتدار بأذن الله بعد 8 سنيين
طبعا مافيش أي نوع من المهارات الحرفيه
ولا الغير حرفيه
والصنعه الوحيده ألي أتعلمتها هي أزاي تحضر تورتة أيس كريم .. يعني ماقولكش الناس حتقطع بعضها علشان أشتغل عندهم
أما عن عقليتي الأقتصاديه فامقولكش ..
أرشيدوق النمسا الله يرحمه كان علي طول يقولي أنت عبيط يابني؟؟
فمع هذه الأمكانيات العبقريه أتخرج أروح فين
يعني فاشل وخايف أتخرج
اللذيذ في الموضوع أن صحابي بيشوفوا أني بحسبها زياده عن اللزووم
بس هما مش مدركيين أني بحسب كل ألي في أيدي .. الحمد لله رحم ربنا موجوده
وبيسترها علي ديما
بس لازم أدرك أمكانياتي المعدومه كويس علشان علي الأقل أعرف أتخذ قراراتي بشكل سليم
ماعلينا من صحابي
و ما علينا من فشلي
و ما علينا من خوفي
الحمد لله علي نعمة الستر
كان معكم
الفاشل المستور
أنا

Friday, May 13, 2011

عن ما مضي

فات كتير من الوقت علي أخر زياره ليه هنا
حصل حجات كتير
ناس راحت وناس جت
حياتي أختلفت كتير
حتي أنا أختلفت كتير
بس تلخيصا لما مضي ممكن أقول
أول أختلاف هو وفاة والدي -أسألوا له الرحمه-وقد أهتز عالمي بعدها كثيرا
تقربي من أمي -أم التحف الثلاثه- وتحفس أفندي
قيام حرك أصلاح في الشارع المصري بتاريخ 25 يناير
أكتسابي مجموعه من الصداقات الجديده والتي
عوضتني عن صداقات فقدتها
أعتقد أني أختلفت من الداخل أيضا
ولكن في المجمل العام
مأزال
أنا

الأشاره لقطت

ألو ..ألو
أعتقد أن الأرسال أشتغل
أنا رجعت
أخيرا
أنا رجعت
أعتقد أن أخر رساله أستقبلتوها مني كانت من أكثر من سنه
ياه .. حجات كتير أتغيرت
بس بأذن الله من النهارده الوضع حيرجع ينتظم تاني
من كان دائما معكم
أنا