Wednesday, April 22, 2009

سؤال طويل حبتين

هو المفروض أدور علي نصي التاني ولا هو ألي حيلاقيني
كل حاجه ماشيه بالأقدار
كل حاجه مكتوبه من قبل مانتكون في ظهر سيدنا أدم
فهل ياتري أدور عليها ولا هي مكتوبالي
أعيش أحلم بيها ولا أدور عليها
وعدين أنا طماع
أنا عايزها رومنسيه حنينه
فاهمه متفتحه
تحبني وتخلصلي
تصبر عليا وتقف جنبي
كل ده وأنا
معنديش حاجه أديهالها
غير أحلامي الرومنسيه
وأفكار مكنها الوحيد دماغي
وكتير من القلق علي مستقبلها
وصبر أيوب علشان أطور نفسي
مش الأفضل أني أفضل لوحدي
أحلم أنها عاشت قبلي
أو أنها حتيجي الدنيه بعدي
تعيش حياه تستحقها مع أنسان يستحقها
يقدر يسعد قلبها
ويقدر يجمع نفسه بيها تحت سقف بيت من الأسمنت
و الحديد المسلح
مش في عشه مكنها الوحيد أحلامي
ممكن حد يجاوبني
أعمل أيه
أستني ولا
أستني...
؟؟؟؟

عايز أستحمي

ببساطه عايز أستحمي
أنا أستحميت من 8سعات و25 دقيقه
بتوقيت ديب ثوت
بس لسه عايز أستحمي
عايز أقف تحت الدش وأشغل السخان
أتفرج علي بخار الميه وهو بيرسم ألاف الخيلات والصور
الرذاذ الناتج عن أرتطام حبات الميه بجسمي
السخونه في الجو
ديما بحب الوضع ده
الهدوء الممزوج بصوت اللهب الخاص بالسخان وصوت
الميه وهي بتنزل
أعتقد أنهم لو سابوني في الوضع ده حفضل واقف لأيام
أنا في المعتاد بستحمي في ساعه ألا ربع لما ببقي مستعجل
ولما باخد رحتي بفضل تحت الميه لحد ماحد يجي يخبط
علي باب الحمام علشان يطلعني
فعلا دماغي بتطفي وأنا في الوضع ده
كل حواسي بتتركز في الأحساس بدفئ الميه
وتأمل الأشكال ألي بتتكون بفرشة بخار الميه علي خلفيه من ضوء النيوون
بعد لما بستحمي بحس اني انسان جديد
أنسان مختلف
أنا جوه وعاء جديد
وبفضل بنفس الأحساس ده لحد مأبص لوشي في المرايه
وألاقي كل حاجه زي ماهي
سعتها بعرف ان مفيش فيده
أن أنا حفضل زي مأنا
و أني محتاج أستحمي تاني علشان أحصل علي أنسان جديد
غيري
أنا

...................

كل مره في المعتاد ببقي داخل و أنا ناوي أكتب
حاجه معينه في بالي
يعني لو كنت عرفت أدخل أمبارح كنت كتبت عن الأكتأب ألي عندي
وأول أمبارح كنت كتبت عن الكليه
وقبلها كنت كتبت عن النادي
أنما النهارده
عندي أحساس عجيب
شعور بالفراغ وأنعدام الوزن
أنا بتفرج علي الناس من جوه عنيه
لا دي حياتي
ولا المشاكل دي مشكلي
شويه وحسيب الراس دي و أرجع لجسمي التاني وحياتي التنيه
مفيش حاجه شغلاني
قمة اللا مبالاه
حتي مش عارف أنا داخل هنا بأكتب أيه ولا بكتبه ليه
مجرد فراغ
مجرد كتابه
مجرد أفكار ومشاعر


Sunday, April 12, 2009

كل الطرق تؤدي إلي روما

التاج المشع علي رؤس الأصحاء
أمبارح كنت متصور أني كسرت صباع رجلي في تدريبات الكنغوفو
فنزلت النهارده الصبح علشان
أروح للدكتور
وأكتشفت نعمه عمري مأخدت بالي منها
المشي القويم أنا كنت بمشي بسرعه مناسبه
بمشي برحتي بعدي الشارع بسهوله
بطلع الرصيف بكل بساطه
بنزل علي سلالم بيتنا في سواني
كل ده أختلف النهارده
لدرجة أني أحتجت أوصل للمستشفي ألي جنب بيتنا
نص ساعه في حين أني كنت بوصلها في خلال 10 دقايق
حسيت بصعوبة عبور الطريق
عدم الأتزان والخوف في كل خطوه و أنا نازل علي السلم
الأحساس بأن الشارع ماشي حاوليا برتم أسرع من المعتاد
أو أنا ألي أبطاء من الحياه كلها
ناس بتيجي جنبي وتروح وأنا لسه بخطي في طريقي بخطوات
محدوده بطيئه
وده فكرني بوضعي العام في الحياه
الناس بتيجي من بعدي تحقق أهدفها وتكمل طريقها
و أنا لسه زي مأنا
ماشي في طريقي بخطاوي هي للزحف أقرب
وألي كانوا معايا شقوا طريقهم
أنا عجوز ومسن
شيخ للفناء أقرب
كيان مهمش علي جانب الطريق
كتبها أنسان ملوش لزمه
أنا

Friday, April 10, 2009

أكبر قفا خدته في حياتي

لقيت ناس كتبه تعليقات
مششششششششششششششششششششششششششش ممكن
انا كنت متصور أني المفروض أبعت أنفيت
أو دعوه لأي حد علشان يعرف يكتب عندي
علي قد مأستغربت علي قد مافرحت
علي قد ما أتصدمت
طلع موقع أسياوي غريب
ولاعزاء للمنطظرين
المبعوت أعلاه
أنا

أنا

كل مره بتكلم عن مشعري
أحداث حياتي
الناس المحيطه بي
أحلامي
بس لحد دلوقتي معتقدش أني أتكلمت عن نفسي
وطبعا ده حيكون من وجهة نظري الشخصيه
أنا هو في زي أنا
أنا ألي وصلت ومحصلتش
أنا ألي طرت ومنزلتش
ﻷ بجد
أنا أنسان عادي من ألي بتقابل منهم دسته وأنت رايح الشغل
بتلاقيني في كل حته عند عم محمد البقال
وفي مكتب أي موظف حكومي واقف في الطبور
جنبك في طبور العيش
ماشي علي الرصيف ألي قدامك
حتي شكلي مش مميز
لا أنا طويل مسافر
ولا قصير
ممكن أكون نحيف
بس مش مسلوع
شعري مش أصفر ولا أسود ولا بني
لونه كده لو صح التعبير مدوحس
خليط من كل الألوان دي
مش وسيم
ومش بعبع
و أن كنت أعتقد أني أميل للقبح قليلا
وده طبعا بشكل نسبي
ممكن ناس تشوفني وسيم
أو ملامحي هديه
أو عفريت العلبه
أما عن طباعي
فأنا خمول مائل للنشاط
بتعصب بسرعه وبهدي بسرعه عبيط يعني
بفتكر كويس كل واحد ضايقني
بس مش بشيل يعني ممكن أسامح
بطيئ المبادره أو بتوه مش عارف
بعد مابيحصل الموقف بفكر في ألي المفروض كنت أعمله
ألا في مرات قليله ربنا بيسترها
أعتقد أني هادي
صوتي عالي وأنا بتكلم
بميل للمرح
خجول نوعا بالنسبه للجنس الأخر
وهو مايفسر أحيانا أني متعالي او متكبر
أعتقد ده ملخص طويل وممل
بالنسبه لأنسان ممكن تكون عديت من جنبه وأنت ماشي في الشارع
مع تحياتي
أنا

قمة السحر وربما أعلي

جميله
رائعه
مش عارف أساسا أذا كان في كلام يوصف جملها
حد جرب أنه ينزل بعد منتصف الليل يتمشي في شوارع الأسكندريه
بس ده طبعا في الشتاء مش في الصيف
طول فترة الصيف بحس أني مش مستريح
الدنيه زحمه
المصيفين عمالين يرموا في زباله في الشارع
الموصلات بتزحف
الوشوش الغريبه بتزيد
ده غير أخونا العرب
أنما في الشتاء
سيبك أنت
أسكندريه بتعتنا
الهدوء والسكون
الليل الساحر
صحيح لسه الزباله بتترمي في الشارع
بس في نوع من الألفه والتعود علي الزباله بتعتنا
ده كله كوم وبعد 12 مساء كوم تاني
الشوارع الريقه
مفيش غير كام واحد مروحين أو ريحين الشغل
الهدوء
النسمه العليله
مش قويه
مش سقعه نوع من الهوا متشموش غير في الوقت ده
مشابه لهوا شروق الشمس بس فيه أختلاف
وياسلام لو تشتي الشتا الخفيف
الشوارع تحت الضوء الأصفر وحبات المطر
كل ده بيطلق للأحلام العنان
الحياه ملكك
الجمال ده كله ليك لوحدك
لوحه ربانيه بها بعض الرتوش البشريه
الأسكندريه كما يجب أن تكون
أمشي في الشارع
بطل تفكرفي أي حاجه
بس تأمل في المكان من حوليك
طير معا حبات المطر
أنكسار نور العمود بتاع الشارع عليها
ملمس السيارات وحبات المطر بتنفجر عليها
رطوبه الجو
الوحده
مجربتش أمشي مع حد في الجو ده
ﻷنه في المعتاد بيفضل يتكلم أو بيجري يستخبي تحت العماير من المطر
في حين أنا بكون عايز المطر والصمت
كان معكم من أروع لحظات حياتي
مراسلكم
أنا

Tuesday, April 7, 2009

عائد من المريخ

بعد مأرسلت النصاب التذكاري بتاعي
وحطيت أنا عيله كومنت
يمكن حد ياخد باله
محدش عبرني وحسيت أني سخيف
يارب ماحولش أعمل كده تاني وأحط نفس في الموقف السخيف ده تاني
مع أني عارف أني حعملها

أخر الأخبار

سادتي وسادتي وسادتي برضوا
مع نشرة الأخبار الحياتي
ومع عنوين الأخبار
أخر تصريحات العميد عن النتيجه
الأستعدادات الميدانيه والمدنيه للزياده من اللياقه البدنيه
حقائق حول أمتحان التجاري وتصريحات منيله
ويلي ذالك الأخبار الأقتصاديه والرياضيه
صرح عميد الكليه في محاضره خبيثه مدسوسه من غير علم الطلبه
وقد أعلن أن النتيجه حتتأخر من يوم 15 من شهر 4
إلي يوم 20 من نفس الشهر أل يعني أحنا ميتين عليها
المهم ماعلينا
وننتقل إلي أخر التجديدات والتطويرات
فقد قمت أنا رحمني الله بالأشتراك في أحد الأنديه الرياضيه معلنا التمرد
علي الحاله المنيله بدنيا ألي بمر بيها والنهجان والتحير والتقطيع
وما إلي ذالك من الأحوال البدنيه الغير مستقره
وقد تم الأتفاق علي الذهاب إلي النادي من خلال وسيط وهو أحد أبناء عماتي
وقد قام المذكور أعلاه بتضليل العداله ومنحي كل مميزات الصفقه دون عيوبها
فقد أعلن أن التدريب سيكون في صورة 3 حصص أسبوعيا
وكان سبب تحركنا نحو تلك الصفقه هو المقابل المادي المتمثل في 20 جنيه
في الشهر -أتجه إلي النشره الأقتصاديه لتدرك السبب- قلت بس هي دي
وكانت الطامه الكبري عندما ذهبت إلي النادي ﻷكتشف أن المدرب أرفع من
عود القصب وعدين قلت أن الجسم مش كل حاجه أكيد الراجل ده عصبه حديد
ومع الأنتقال إلي داخل النادي العمران بالأجهزه قلت أن أنا ألي كسبان من الصفقه
ﻷكتشف أن أنا حتمرن في غرفه جانبيه
خاويه تماما وعدين لقيت الناس ألي معايه وقفو جنب بعض وعكل واحد رفع كفيه
أمام وشه زي اليابنين بس كانت الأيد اليمين مضمومه
تشي خي فو
ده ألي هما قالوه
في أيه ياجماعه أيه ألي بيحصل لقيتهم أبتدوا يجروا ورايا وعدين أكتشفت أن أحنا المفروض نجري في حلقه ورا بعض
وكل لما أجي أتكلم المدرب يقولي مفيش كلام في التمرينه
أحب أوضح للقارء أن كل التمارين كانت من غير أجهزه معتمده علي حركات منمقه للجسد
المهم بعد ماقطع خلفي تمارين
50 تمرين بطن
....
....
.
....
؟؟
((
,,,
:::
؟؟؟
!!!@#$#$
*^$%$!
وبعد أنتهاء المأساه عرفت أني أشتركت في نادي لتعليم الكونغوفو
والله ولي التوفيق
صرح أحد المصادر المسؤله عن نفسها متحدثا عن أمتحان التجاري
الصادر في يوم مش فكره معلنا أحد الأنباء التي كانت طوي الكتمان ولا نعرف عنها
أنه وفي يوم الأمتحان قام مجموعه كبيره نسبيا من الطلبه بمحاصرة دوكتور قسم الشركات
في الماده والمتحكم في نصف الدرجه
وأحاطوا به أحاطة السوار بالمعصم وكان هذا في الدورر الأرضي من مبني العميد
وتعالي هتاف الطلبه حول الدوكتور وهو يقف ينظر لهم مستندا إلي عكاز من عكاكيز البشوات
يستعمله في المعتاد في تفريق التجمهرات التي تحيط به
=الأمتحان صعب
=ده حرام والله
=ليه كده بس يادوكتور
وفي هدوء وحتي صمت الطلبه رد بصوته الجاهوري
- ياجماعه هو الواحد لما بيتجوز بيتجوز كام وحده
صدم الجميع من السؤال وحاولوا تفسيره بأي صوره وربطه من قريب أو بعيد
بصعوبة الأمتحان ولما حاروا قام أحد الطلبه بمجاراته قائلا
=وحده
-ولما يتفرعن بيتجوز كام
=أربعه
-ولما ..............................بيكون كام مره
كان السؤال صادم وخاصه للتعبير الذي قيل علي الملاء ذكورا وأناث والسؤال كان عن التزاوج
الجسدي فحمرت وجوه بعض الطلبه والطالبات وهناك من ضحك في هستيريه
ومن أصابه الذهول بصدمه حولت فمه إلي مصيده روعه للدبان
المهم أن نفس الطالب بعد مافاق من الصدمه قال
=أربعه يادوكتور
هنا قام الدوكتور برفع عصاه للأعلي لتكون في وضعية حرف اللام ل
وقال وهو بيضحك
- أنا..........الدفعه كلها
مستعملا نفس التعبير في السؤال السابق
ولا تعليق
وننتقل إلي التحليل الرياضي
قام منتخب شلتي القومي بالذهاب اليوم إلي المنتزه للعب كرت القدم
وطبعا معا الأحوال الصحيه العال لأعضاء الشله
فقد خسرنا المباره الأولي ب4 أهداف لنا مقابل 6 للفريق الخصم
و أحب أوضح أن كان معاني لاعبين من خارج الشله وكانوا متمتعين بلياقه بدنيه عاليه
وطبعا بعد تلك الطعنه النجلاء تخلي عننا اللعيبه الأجانب ولم يتبقي منهم سوي لاعب واحد
فقط قرر الكفاح إلي جانبنا
ولعبنا المباره الثانيه بالأساسي دون أحتياطي وبمجموعه من الحالات الخاصه
تربعت أنا علي قمتهم مش بقدر أجري ولا بشوف ومش بشوط كويس ومبعرفش أدافع
المهم أول المطش أتفقعنا 4 أهداف مقابل هدف وحيد لينا وجه بطريقه عجيبه شويه
وفجأه أستأسد اللعيبه بتوعنا
لتصبح النتيجه 5-5
وبعد كفاح طويل والكثير من الشوط والزعيق والتهيس والأستعباط
دخل الهدف السادس مرمانا
لتنتهي المباره 6-5
وكنت أنا الحارس المسأول عن تلك المأساه
ورجعنا نجر أذيال الخيبه
وأخيرا إلي النشره الأقتصاديه
أحب أعلن علي الملاء أن اليوم والموافق
8-4-2009
باقي معايا من فلوس ﻷخر الشهر 65
وعدين قررنا نشد الحزام
بس لقينا أنه مفيش فيده
فمن الواضح أن الفتره الجيه حتكون فترة جوع
وحنرفع شعار تقشف للأبد خطوه بخطوه علي نهج غندي
وكانت هذه أخر الأحزان
أو هكذا نتمنا
كان معكم من النشره الحياتيه
أنا

Sunday, April 5, 2009

عندما صمت ديبثوت وتكلم تودري

في البدايه أحب أقول أني أسف علي الغيبه الطويله دي
وعدين أبرر
أنا مكنش ليه ذنب في الموضوع
كل حاجه كانت بسبب عبد الوارث
أولا ديب ثوت سكت مره وحده
وده الجهاز بتاع البيت
وفي المعتاد لما ده كان بيحصل كنت تلاقي
عبد الوارث بالفنله الداخليه والمفك
وعنيه بطق شرار
ويروح داخل علي ديب المسكين
يفضل يلعب فيه لحد ماينطق
ومش كده وبس
أنا أفتكر مره أن الجهاز مات لوحده
ورجع أشتغل تاني قبل مايلعب فيه
معتقوش رح برضوا يدعبس هو سكت ليه
لحد هنا جميل
كان الوضع علي ده الحال لحد ما تودري شرف
وتودري هو الاب توب بتاع مين
أكيد بتاع عبد الوارث
وعينك ماتشوف ألا النور
ديب بقي مهمش وعنده أكتأب
ولما عطل وسكت علي حين غره
عبد الوارث معبروش ألا بعد أجيال
وكده نري أني مليش ذنب في التأخير ده